21 May 2019 10:35

bakteaJr.

Mizo tlangval

Blazers hnehin Warriors-in NBA Finals an lut

NBA Playoff final game 4 khelhah Golden State Warriors chuan Portland Trail Blazers an hneha, he series-ah hian Warriors chak fai vekin 4-0 in Blazers an hneh.

Ti hian Warriors hi a zawnin NBA Finals vawi nga ngawt an luhna a ni a, Finals-ah hian Eastern Conference Playoff semi-final khel mek Toronto Raptors emaw Milwaukee Bucks an hmachhawn dawna, tunah hian Bucks hian 2-1 in hma an hruai mek a, game 4 khel turin an inbuatsaih mek.

Western Conference: Portland Trail Blazers 117 – 119 Golden State Warriors (OT)

He inkhelah hian Warriors lamin Kevin Durant, Andre Iguodala leh DeMarcus Cousins-te chhawr thei lo vek mahse hnehna an chang tho va, kum 1957-1966 hnuah a vawi khat nan NBA Finals a zawna vawi nga lut leh thei hmasa ber an ni. Kum 1957-66 inkar khan Boston Celtics chuan a zawnin NBA Finals hi vawi sawm ngawt an khel.

He series-ah hian Warriors hi an hnufual hmasa fova, mahse hnehna an chang ziah thung. Game 2 point 17-in an hnufual hnuah Blazers hi an lehthala, game 3 ah pawh point 18 a an hnufual hnuah hnehna chang lehin game 4-ah pawh hian point 17 in a hnufual leha, hnehna an chang leh ta tho a ni.

Warriors tan Stephen Curry leh Draymond Greeen-te an che tha dun hle a, triple-doubles nei ve ve in, playoff game khat chhunga team khat atanga player pahnihin triple-doubles an neih vawi khatna a ni nghe nghe.

Green hian point 18 a score-a, rebound 14 la in assist 11 a nei bawka, overtime-ah 3-pointer pawimawh em em mai a score bawk. Curry hian point 37 a nei a, rebound 12 la in assist 11 a nei ve bawk.

Blazers tan dam chiang lo chunga khel Damian Lillard a khel tha a, point 28 score-in assist 12 a nei. Mayers Leonard chuan Blazers tan point 30 score-in rebound 12 a la ve bawk a, a career-a game khat chhunga point a la score tam ber tum a ni.