26 May 2015 08:44

Asanga Tlau

Blatter thlan nawn Football in tuar thei - Platini

Uefa chief Michel Platini chuan Fifa president atana Sepp Blatter thlan nawn leh a nih chuan football in a tuar ang tiin a sawi.

Kum 79 a upa Blatter hian 2011 khan 2015 inthlanah Fifa president atan thlan nawn leh a nih chuan a hnawl tur thu a lo sawi tawha, tun dinhmunah erawh president ni leh tura beiseiawm ber a nih leh meka, a chelh leh ngat a nih chuan a vawi nga-na atana thlan tlin a ni tawh dawn a ni. Fifa president nihna chelh hun chhung hian kum li a awh a ni.

He nihna hi a chelh chhunzawm chuan a duh emaw duh lo emaw, a dik emaw dik lo emaw, Fifa hmel hi a bal tawh viau ang. Thuneihna pawh Fifa in an tlachham tawh viau ang. Chutah chiah chuan football hian a tuar dawn a ni tiin Platini chuan a sawi. Presidency chuh tum Jordan mi Prince Ali Bin Al Hussein chu Platini hian a tlawp tih a sawi bawk.

Kum 59 a upa Platini chuan Blatter a'n thuneihna a chan chhung chuan Fifa hmel a bal zel dawn a ni tiin a sawi chhunzawm bawk a. Blatter a kaihhruai Fifa executive committee member thenkhat te chu nihna hmang suala puh an lo ni tawha, he puhna hi dawt a nih thu a chhan a ni tawh bawk.

English Football Association leh Scottish FA te chuan Prince Ali thlawp an tum thu an chhuah ve tawh bawka, Luis Figo leh Michael van Praag te an inhnuhdawh leh tak avangin Zurich khawpuia inthlanna neih turah he nihna chuhpui tur hian Prince Ali chiah a bang ta a ni.