29 May 2020 05:07

inkhel

BKFC lamah £16 million in Mike Tyson an thlem dawn

Mike Tyson chu Bare Knuckle Fighting Championship lama tel turin £16 million zeta thlem an tum.

Boxing legend Mike Tyson chuan tun hnaiah thawm a nei lian chho hle a, kum 15 zet inhnek a chawlhsan tawh hnuah boxing ring luhchilh leh tumin a inbuatsaih chho mek a. A kum tam chho ve tan tawh mah se a che vel a la dik hle a, hei vang hian mi tam tak chuan a inlan hun an nghakhlel hle a ni.

Heavyweight boxing champion hlui hian tu ber nge a hmachhawn dawn tih chu chiang taka sawi a la ni lo a, thu thang neuh neuh erawh a tam hle a. Hetiang boruak karah hian Bare Knuckle Fighting Championship lampang pawhin Tyson chu thlem an lo rilruk ve mek a ni.

Bare Knuckle Fighting Championship president David Feldman chuan, “Mike Tyson hi BKFC lama sawm luh kan rilruk a, engtin nge a lo dawnsawn dawn tih chu kan hre bik lo a ni,” a ti.

“Kan rilruk danah chuan Mike hi £16 million vel bawra thlem kan duh a, eng boruak pawh thleng thei a ni a. Tun dinhmunah hi chuan kan thil tum hi kan la tihlawhtling rih lo a, chutih rualin kawng erawh a inkhar tawp bik lo chuan kan hria a. He thil hi a tak ram thlenpui thei tur chuan tih dan tur chu ka hre tawhin ka hria,” a ti bawk.

Tyson chuan UFC a ngaina hle a, Manchester khawpuiah vawi khat chu fight a enkawl ve tawh nghe nghe a. Tun hnaia boxing ring luhchilh leh a tum chungchangah pawisa a neih belh theih phah dawn nia sawiin, Evander Holyfield nen an inhnek a rinawm deuh ber rih a ni.

UFC flyweight champion hlui Henry Cejudo kaihhruaina hnuaiah Mike Tyson hian training a nei mek a, a taksa pawh a insiam tha leh tawh viau mai a. Kum 53-a upa Mike Tyson hmaa ding thei tur chu kum 43-a upa Wanderlei Silva niin David Feldman chuan a sawi a ni.