WBO middleweight title kawltu Billy Joe Saunders chuan a champion belt chu a dah awl a, Demetrius Andrade leh Walter Kautondokwa-te chuan WBO middleweight title hi an inchuh dawn.

British middleweight boxer Saunders hian doping test a paltlang zawh loh avangin Massachusetts State Athletic Commision chuan Demetrius Andrade nena an intum tur chu an lo thulhtir tawh a, boxing licence pawh an pe duh lo nghe nghe.

Hetiang taka hrem a nih hnuah Saunders hian a champion belt hi dah awlin, doping test a paltlang zawh loh avangin thupha a chawi bawk. Saunders-a promoter Frank Warren chuan, “Billy Joe hian a chungchang chinfel a ngaih avangin lunghnur tak chungin a world title hi a dah hi awl ta a ni,” a ti.

Kumin October ni 20 hian Saunders leh Andrade-te chu intum tura tih an ni mahse, a thleng dawn ta lova, sawi tawh angin Andrade hian Kautondokwa chu October ni 20 hian a tum zawk dawn a, WBO middleweight champion thar an awm ngei dawn tihna a ni.

Saunders-a thisenah hian Massachusetts State Athletic Commission (MSAC) chuan oxilofrine an hmu a, hemi avang hian kum 29 mi hi an hrem. Oxilofrine hi phalloh thil ni mahse World Anti-Doping Agency (Wada) leh UK Anti-Doping (Ukad)-te chuan boxer-te an in hnek dawn niah boxer-te thisena oxilofrine hi hmuh a nih chauhvin hremna an kengkawh thin a, MSAC erawhin engtik lai mahin a phallo thung.

Saunders-a promoter Warren chuan MSAC-in Wada kalhmang a zawm loh avangin Saunders chu doping test-a fail  a nih loh thu a sawi  a, Warren hian MSAC chu an khinglet tur thu a sawi tel bawk. September thla khan British Boxing Board of Control chuan Saunders hi pound 100,000 an lo chawi tir tawh a, pawisa an chawi tir chhan hi Saunders-a video thalo tak chu social media-a theh chhuah a ni a, he video-ah hian Saunders hi a che mawi lo hle a, a chet dan chiah hi a chipchiara tarlan a nilo.