21 Nov 2020 03:55

inkhel

Bilkhawthlir atangin England ramah

Bilkhawthlir tlangval chhuanawm English club-a thawk tur chu!

England ramah khuan Premier League a sang ber a, a dawt tu chu Championship a ni. Championship hnuaiah hian League One a awm a, a hnuai lehah League Two a awm leh bawk a. Heng English club league sang pali-a tel thei club te hi professional club tia chhiar vek an ni.

Mizo tlangval ngei mai, England ram pawh la dai lo, tuna Bilkhawthlir, Kualmawi Venga cheng mek, kum 25 mi Chuaungurpuia Pachuau s/o PC Lalmalsawma chuan Premier League hnuai chiaha mi, Championship League-a khel mek Brentford Football Club-ah Football Scout (Video Recruitment Consultant) hna tha tak mai a hmu a ni.

Brentford hi tun season liam taah khan Premier League khel turin an inpet tling tep a, playoff-ah Fulham hneh loin an inpet kai ta lo hlauh a ni.

Chuaungurpuia hian contract offer hi November 19 ah khan a dawng a, a hna hi an khuaa awm chungin a thawk thei dawn a. Computer, phone leh wifi hmangin a hna hi a thawk ang. A hna ber tur chu Brentford FC 1st team leh B team te tana player tha, khawvel huapa zawn kual a ni dawn a, chu chu club management lamah a report zel dawn a ni.

Club lam hian a player report tur an hriattir ang a, ani hian a lo report zel mai dawn a, player pakhat report zelah hlawh siamsak a ni ang.

Bilkhawthlir tlangval hian India rama Football Academy leh I-League atanga ISL club te thlengin Scout hna hi hlawh nei lo tur pawhin a dil ve thin a, hnawlsak ni foin, Mizoram club te zingah pawh hetiang lam hna hi a dil thin a, a hmuh mai theih tak lohah chuan tuipuiral lamah a insawrbing ta niin a hriat.

Premier League ni lo mahse Championship-a khel club te hi an professional angreng hle a, team 24 laiin Premier League-a kai inchuhin an intum kual thin a. Tunah hian Norwich, Stoke City, Watford, QPR, Swansea, Bournemouth, Nottingham Forest te pawh an khel ve mek a ni..

Chuaua hian Jorhat Engineering College, Assam-ah Electrical Engineering zirin, Mizoram lama a rawn haw chhoh hnuah an khuaah awmin football a tuina chuan ngaihtuahna a rawn hmantir a. Football coaching leh scouting lamah hian a tui hle a, internet hmang tangkaiin a thiamna a tih belh zel a. Khawvela a football ngaihsanna ber England rama Championship League te zir chiangin player an lak luh dan te bel taka hriat a tum thin a, chutiang zel chuan tun ang hun hi a rawn thleng thei ta a ni.