Los Angeles Lakers chuan DeMarcus Cousins chu an chhui zui dawn nia sawiin, NBA nen an thawkho ang a, thil awm dan chiang zawka hriat an tum thu an sawi.
Tun hnaiah Lakers center DeMarcus Cousins chuan a bialnu hlui chu a vau nasa hle nia hriat thar a ni a. A ruka an aw an lo record chu tun hnaiah an phawrh thar a, hetah hian Cousins ni ngeia ngaih mipa chuan hmeichhe hnenah silai hmanga a lua kahah a vau a ni.
Website lar tak pakhat, TMZ.com chuan Cousins leh a bialnu hlui Christy West te inbiakna chu an tichhuak a. Kar hmasa Inrinniah khan DeMarcus Cousins hi hun rei tak a lo kawp tawh Morgan Lang nen Atlanta-ah an innei a. Hemi hma ni chiah, Zirtawpniah khan Christy West hnenah an fapa chu inneihnaa kaltir turin a ti a, hei hi a lo remtih loh avangin silaia kahah hian a vau ta a ni.
An inbiakna an lo record-ah hian Cousins ni ngeia hriat chuan, “Vawi khat chiah ka zawt leh dawn che a, a aia thui zawk kal ngai lo hram se. Khawngaihin ka nupui neihnaah hian ka fapa kha i rawn teltir thei ang em?” a ti a.
Christy West chuan a remtih loh thu a sawi hnuah mipa chuan, “Heti a nih chuan i luah khan silaiin ka kap ngei ngei ang,” a ti zui a ni.
Alabama khuaa Mobile Police Department te chuan hemi chungchang hi an chhui tan mek a, Christy West pawhin police te hnenah hian thil awm dan a sawi a, police te hian an chhui zui mek niin an sawi.
Lakers chuan Thawhlehniah khan thu chhuah an siam a, he thil thleng chungchang hi an ngai thutak hle niin an sawi a. “DeMarcus Cousins chungchanga inpuhna hi kan ngai thutak hle a, thil awm dan hi chiang taka hriat ngei kan tum,” an ti.
“Thil thlen dan chiang zawkin kan chhui dawn a, thudik hi hai chhuah ngei kan duh a. Cousins hian thiamloh a chang a nih chuan hrem ngei pawh kan tum a ni,” an ti bawk.
DeMarcus Cousins hian July 6 ah khan Los Angeles Lakers-ah hian kum khat chhung atan contract a ziak thar a, tun thla tir lamah khan season thar atana an inbuatsaihnaah a khup a tina a, hei vang hian hun eng emaw chen chu a inkhel thei dawn rih lo a ni.
Kum 29-a upa Cousins hi vawi thum ngawt All-Star a lo ni tawh a, kum 9 chhung NBA huanga a awm tawh hnuah a average chu game tinah 21.2 points, 10.9 rebounds a ni.