31 Oct 2018 10:38

inkhel

​Bethlehem Vengthlang FC-in Electric Veng FC an hneh

October ni 31, Nilaini tlai Mc Dowell's No 1 Soda Mizoram Premier League (MPL) Season 7 Round 10 match thumna Bethlehem Vengthlang FC leh kai thar Electric Veng FC inkhelah Bethlehem Vengthlang FC chuan sihnih faiin Electric Veng FC an hneh a, point thum anhlawh chhuak. He inkhelah hian Bethlehem Vengthlang FC defender Jonathan H. Lalhriatkima chu Man of the match-ah thlan a ni.

Team pahnih te hi round 5-ah in hmachhawn tawhin Electric Veng FC hian 2-1 in an hneh a, an intawn vawihnihnaah erawh Bethlehem Vengthlang FC chuan hnehna an chang. Khelh tawhah Electric Veng FC hian point 17 neiin pathumna an ni mek a, Bethlehem Vengthlang FC hian point 5 neiin a mawngphah an luah lum rih a ni.

03:00 PM Electric Veng FC 0-2 Bethlehem Vengthlang FC

(C.Lalrintluanga 28', Lalmuanzova 69')

MoM: Jonathan H. Lalhriatkima, Bethlehem Vengthlang FC

Goal lut te hi first half leh second half-a lut an ni a, first half-ah Bethlehem Vengthlang FC tan C. Lalrintluanga chuan goal hmahruai a khung a, Second half-ah Lalmuanzova chuan an goal hnihna a khung.

Inkhel tan a ni a, Electric Veng FC chuan nawr zawk mahse Bethlehem Vengthlang FC chuan goal thunna hun tha an nei hmasa zawk a, box chhung a tang a, forward C. Lalrintluanga shot tha zet chu a goal dawn nia a lan laiin goal ban a fuh. Electric Veng FC pawhin goal thunna hun tha nei ve bawkin midfielder Isaak Vanlalpeka freekick tha zet chu Bethlehem Vengthlang FC keeper R. Lalhmangaihzuala chuan a dan sak.

Bethlehem Vengthlang FC chuan minute 28-ah an hun tha neih hmang tangkaiin winger Lalruatkima ball pek fing zet chu box chhunga awm C. Lalrintluanga chuan chiang zetin anhmahruaina goal a khung. Electric Veng FC chuan an siphurh sut ngei tumin nawr mahse goal erawh an thun thei lo a, goal luh belh lo in Bethlehem Vengthlang FC chuan 1-0 a hmahruaiin chawlhlawk an hmang zui ta a ni.

Second half tan a ni a, Bethlehem Vengthlang FC chuan inkhel thunun zawkin goal thun belhna hun tha an nei zui a, defender H. Lalhlimpuia freekick tha zet Electric Veng FC keeper Vannunmawia danper chu box chhunga awm K. Lalnunpuia chuan goal sirah chiah a pet.

Electric Veng FC pawhin an siphurh sut ngei tumin an nawr a, Vanlalremkima corner pet tha zet chu box chhunga awm Isaak Vanlalpeka chuan goal sirah a tauh hnuah Vanlalremkima'n Bethlehem Vengthlang FC keeper R. Lalhmangaihzuala chiah a hmachhawn hnuah referee-in offside a ham.

Bethlehem Vengthlang FC chuan minute 69-ah anhun tha neih hmang tangkaiin Lalmuanzova'n bal tha a hmuh chu box-ah la lutin Mawitakin an goal hnihna a khung. Electric Veng FC chuan goal thun ngei tumin counter attack-in an nawr a, Lalmalsawma leh R. Lalthanmawia chuan an hun tha neih an hloh. Goal dang luh belh tawh lo in Bethlehem Vengthlang FC chuan 2-0 in hnehna an chang ta a ni.

(adsbygoogle = window.adsbygoogle || []).push({});