02 Nov 2018 10:42

inkhel

​Bethlehem Vengthlang FC-in Chawnpui FC an hneh

November ni 2, Zirtawpni zan Mc Dowell's No 1 Soda Mizoram Premier League (MPL) Season 7 Round 11 match hnuhnung ber Chawnpui FC leh Bethlehem Vengthlang FC inkhelah Bethlehem Vengthlang FC chuan sihnih faiin Chawnpui FC an hneh. He inkhelah hian Bethlehem Vengthlang FC goalkeeper R. Lalhmangaihzuala chu Man of the match-ah thlan a ni. Goal lut te hi first half-a lut ve ve an ni a, Bethlehem Vengthlang FC tan K. Lalmunpuia leh C. Vanlalhmangaiha chuan goal khat ve ve an khung.

Team pahnih te hi round 4-ah in hmachhawn tawhin chak zawk awmlo in 1-1 in an inhneh tawk a, an intawn vawihnihnaah erawh Bethlehem Vengthlang FC an chungnung zawk. Bethlehem Vengthlang FC hian relegate pum pelh theihna hun an nei mek. Khelh tawhah Point 8 neiin a mawngphah luah lum rih mahse, Ramhlun North FC Point 1 chiahin an umphak lo. Chawnpui FC hian point 14 an nei mek a, semifinal khel turin hneh loh neih a thiang tawh lo.

07:00 PM Chawnpui FC 0-2 Bethlehem Vengthlang FC

(K. Lalmunpuia 24', C. Vanlalhmangaiha 42')

MoM: R. Lalhmangaihzuala, Bethlehem Vengthlang FC

Inkhel tan a ni a, team pahnih te an innawr tawn zak zak hnuah Bethlehem Vengthlang FC chuan an hun tha neih hmang tangkaiin minute 24-ah defender H. Lalhlimpuia free kick tha zet Chawnpui FC keeper Thomas Lalthlamuana namper chu buai nuaih karah K. Lalmunpuia chuan mawi takin an hmahruaina goal a khung.

Chawnpui FC pawhin goal thunna hun tha neiin box pawn chiah a tang a Vanlalthanga shot tha zet chu a goal dawn nia alan laiin Bethlehem Vengthlang FC keeper Lalhmaa chuan a dan sak. Huntawp dawn minute 3 ala awmin Bethlehem Vengthlang FC chuan an hun tha neih hmang tangkaiin Lalmuanzova ball vawrh luh tha zet chu box chhunga awm C. Lalhmangaiha chuan chiang zetin an goal hnihna a khung. Bethlehem Veng FC chuan 2-0 a hmahruaiin chawlhlawk an hmang zui ta a ni.

Second half-ah Chawnpui FC chuan nawr nghalin an siphurh sutna hun tha an nei nghal a, box pawn chiah a tang a Vanlalnghenga shot tha zet chu Bethlehem Vengthlang FC keeper Lalhmaa chuan a dan sak a, Lalruatfela corner pet tha zet chu box chhunga awm Lalruatfela chuan goal ban a pet per hnuah box pawn dinglam sir a tang a Jerry F. Zonunsanga shot tha zet chu Bethlehem Vengthlang FC keeper Lalhmaa chuan a dan sak.

Chawnpui FC chuan nawr chhunzawmin Vanlalthanga corner pet tha zet chu Lalthlamuana chuan hnai tak atangin goal kham chungah a pet a, Vanlalthanga free kick tha zet chu a goal dawn nia a lan laiin goal kham a per bawk.

Huntawp dawnah Chawnpui FC chuan hun tha nei leh in box chhung chiah a tang a K. Roluahpuia leh Vanrammawia Ngente shot tha zet chu Bethlehem Vengthlang FC keeper Lalhmaa chuan a dan sak. Chawnpui FC an vanduai a tih loh theih loh. Goal an khung thei lo a, goal dang luh belh lo in Bethlehem Vengthlang FC chuan 2-0 in hnehna an chang ta a ni.

(adsbygoogle = window.adsbygoogle || []).push({});