England leh Arsenal Women forward Beth Mead chuan, hmeichhe tana Ballon d'Or an siam a sawisel a, a tikimtu ang lek niin a hmu.
Ballon d'Or hi French chanchinbu pakhat France Football buatsaih ani a, 1950 atanga sem tan kha niin ngaihhlut a hlawh hle. Football-a mimal chawimawina sangber a ni a, dawng thei leh dawng pha nih pawh a awlai lo.
2018 atang khan hmeichhe tan Ballon d’Or Feminin an sem ṭan a, tun thlengin player paliin an dawng tawh. FIFA pawhin 1991 atang khan Award an buatsaih a, FIFA World Player of the Year tia hriat niin, ngaihhlut a hlawh ve viau mai.
2001 atang khan hmeichhe tan an semchhuak ve tan a, 2015 khan hlawm khatah dah niin a hming pawh an thlak nghal a, The Best FIFA Award tia kan hriatlar tak hi a ni.
Mead hian 2022 Ballon d’Or Feminin-ah khan pahnihna dinhmun a luah a, kumin Ramtuk thlaa semchhuah The Best FIFA Women's Award-ah khan pathumna ani bawk. Award pahnihah hian Alexia Putellas-in lawmman a dawng ve ve a, Sam Kerr leh Alex Morgan-te pawhin an tluk pha lo.
Mead hian BBC Sports Personality of the Year Award a dawng a, hmeichhe footballer zinga he chawimawina dawng thei hmasa ber a ni. English forward hian Ballon d'Or aiin FIFA Award a ngaihlu zawk tih a sawi a, Ballon d'Or hi a dah pawimawh ve vak lo.
Kum 27 mi chuan, "Award pahnih hi ka zah ve ve a ka ngaihlu khawp mai. Mahse hmeichhe tan Ballon d'Or an siam hi chu ho tihna ka nei a, tih loh aia ti ve mai mai an ang ber. Putellas-in a dawn khan dawhsanah a lawn chho a, zawhna tlemte an zawh hnuah chhukin a ropui teh chiam lo.
"Mipa leh hmeichhe award an sem inkarah lawmman pali vel an sem phawt a, hei hian hmeichhe lam an ngai pawimawh tak tak lo tih a tilang. Benzema-in lawmman a dawn khan a chhungte zawng zawng nen thla an la a, tlarhmaa thu ve tho Putellas chu tumahin an ngaihsak lo. FIFA Award-ah erawh engkim a felfai a tel ve nih pawh a nuam hle." tiin Boots, Balls and Bras Podcast-ah a sawi.
Mead hian Sunderland atangin professional football a luhchilh a, 2017 khan Arsenal panin team dang ala zawm leh lo. England tan game 50 khelin goal 29 a khung tawh a, UEFA Women's Championship, Arnold Clarke Cup leh She Believes Cup-ah te vawi khat theuh a champion pui tawh a ni.