Best Female Athlete Award dawngtu Mary Kom

30th August 2019, 11:08PM

Mary Kom chu Asia khawmualpuia hmeichhe infiammi zinga tha berah an thlang a, he chawimawina hi hmeichhe zinga dawng hmasa ber a ni.

Asian Sportswriters Union (AIPS Asia) te chuan a vawi khatna atan Asia khawmualpuia infiammi tha an tihte an thlang chhuak a, hmeichhe lamah chuan Indian boxer ropui MC Mary Kom an thlang a, mipa lamah chuan South Korea leh Tottenham forward Son Heung-min an thlang a ni.

Kum 36-a upa, fa pahnih nei tawh Mary Kom chu hmeichhe boxer zingah chuan World Championship title vawi 7 la thei awm chhun a la ni a. Thla tharah hian World Championship a khel leh dawn a, gold medal vawi 7 lak theih ngei a tum dawn a. Mary hi a champion leh thei a nih chuan Cuban legend Felix Savon aiin a chungnung ang a, world record thar a siam thei ang.

September 7 khian World Championship chu a awm dawn a, Mary Kom chu 48kg category huanga awm ni mah se thla thara inelna lianah hian 51kg flightweight category-ah a tel dawn a. Hetia a telna a thlak danglam chhan chu kum thara Tokyo Olympics-ah 51kg category chu a tinzawn ber a nih vang a ni.

Manipur boxer hi Asia khawmualpui huap boxing inelnaah a che tha thei hle a, hei vang tak hian ‘Best Female Athlete Award’ chu an hlan phah a ni.

Son Heung-min chu mipa infiammi zinga tha berah an thlang a, ‘Best Male Athlete Award’ an hlan a. Kum 26-a upa South Korean footballer, Premier League club Tottenham Hotspur striker hian nikumah khan an ram football team chu Asian Games gold medal a lakpui a ni.

Kum 26-a upa Son Heung-min hian 2008 kumah khan FC Seoul ah bul a tan chho a, hemi hnuah hian Germany panin Hamburger SV leh Bayer Leverkusen te a zawm leh a, 2015 kumah khan England ramah kalin Tottenham Hotspur a zawm ve leh a ni.

Asian Cup champion Qatar national football team hnenah chuan Best Asian Male Team Award an hlan a. Anni hian Asian Cup final an thlenna kawngah goal khat chiah an chhuah a, final-ah hian Japan an hneh a. An team-in title lian an lak hmasak ber niin, 2022 FIFA World Cup chu an thleng dawn a, an khel ve nghal dawn a ni.

2011 Women’s World Cup champion, 2015 runners-up ni bawk Japan hmeichhe football team te hnenah Best Asian Female Team Award an hlan bawk a ni.

Selangor Chief Minister Y.A.B. Tuan Haji Amirudin Shari chuan chawimawina hi ram hrang hrang atanga infiammi kal khawm zinga an thlan chhuahte hnenah hian a sem a. AIPS Asia hi Asia khawmualpuia infiamna chungchang ziak thin an ni a, anni hi 1978 atanga indin tan an ni.

Copyright © inkhel.com 2024. All rights reserved.