Liverpool chuan Christian Benteke lakluh an tum ruh hle a, pawisa bakah Rickie Lambert emaw Fabio Borini pekbelh mai an huam tawh niin The Independent chuan tarlang.

Belgian striker Benteke hi a khelh mekna Aston Villa-in hralh an phal lo va, chelh an duh tih an tarlang tawh. A contract neih mekah leichhuah theihna zat £32.5m a awm mek bawk a hei hi Liverpool hian an ngam mai dawn niin sawi a awm.

Kum 24 mi Benteke hian Villa chhuahsana club lian zawk zawm a duh niin an sawi a, kum 2017 thleng daih contract ala neih pawh ziahbelh a tum lo niin tarlan a ni.

Season liamtaa beisei pha lo Liverpool hian an tlarhma lam thuam that an tum a, tun nipui transfer chhunga che na berte zingah an tel mek.

Benteke mana pek tel an tum ni a sawi pakhat Fabio Borini hi West Ham United-in lakluh an tum a, £8m sen an huam niin Express chuan an tarlang.

Italian striker hian kum 2012 khan Merseyside club hi a zawm a, season liamta khan game 18 chiah a khel phak a Brendan Rodgers rin zingah a tel pha meuh lo.

Hammers hian Marseille atangin French winger Dimitri Payet an lalut tawh a, an manager thar Slaven Bilic chuan an tlarhma tihchak a duh a striker thar an melh mek niin an sawi.

Lambert leh Borini an nghin lai hian Mario Balotelli pawh Liverpool chhuahsan tur zingah sawilan ala ni zel a, Turkish club Trabzonspor nen an in dawr mek nin The Sun chuan an thai lang.

The Reds hian tun nipui transfer hun hawn mekah Brazilian forward Roberto Firmino leh Danny Ings-te an tlarhmaa hman turin an lalut tawh a, Lille atangin Divock Origi pawh an kokir dawn a an neihsa zinga ami tu emaw ber hi chu an chhuak ngeiin a rinawm.