Nizan khan Real Madrid chuan European title vawi 10na hmel hmuh puitu Carlo Ancelotti chu an ban a, Real Madrid president chuan karleh lamah an manager thar tur chungchang an puan chian tur thu a sawi nghal.

Hetih lai hian Napoli manager Rafael Benitez chu Real Madrid manager ni tura rinkai ber a ni chho mek zel a. Kum 55 mi, Liverpool boss hlui hian Real Madrid-ah contract a la ziak lo chauh mai niin, inbiakna thui tak kalpui a nih tawh thu bbc chuan a tarlang.

Spaniard Benitez hian La Liga lamah pawh hnuhma tha tak a lo nei tawh a, Valencia a enkawl laiin La Liga title pahnih leh UEFA Cup te pawh a lo lakpui tawh a ni. 2013 khan Serie A club Napoli a enkawl tan a, season hmasa khan Coppa Italia an chawi bawk a. Benitez hian Liverpool a enkawl laiin Champions League a chawipui nghe nghe a ni.

Carlo Ancelotti hian season hmasa khan Real Madrid chu Champions League title lakpui mahse tun season-ah erawh a NIL pui a, hei vang hian Real Madrid hian an manager hi an thehchhuak leh ta a ni.