​Benitez-a'n Napoli chhuahsan dawn chiang

28th May 2015, 11:05PM

Rafael Benitez chuan Napoli a chhuahsan dawn tih a sawi chiang ta a, tun Pathiannia Lazio nen Serie A match hnuhnung ber chu Napoli a enkawl hnuhnun ber a nih dawn thu a sawi chiang ta a ni.

Napoli hi Serie A table-ah palina an ni mek a, pathumna Lazio chu point 3 in an phak lo mek. Tun Pathianni hian Lazio nen an inhmachhawn dawn. Hetah hian goal difference-a hniam zawk Napoli hian hnehna an chang a nih chuan point an innih rual chiah dawn a, Serie A-ah hian goal difference aiin Head to head an en hmasak zawk avangin Napoli hian hnehna an chang a nih chuan Champions League an khel thei dawn a, qualifying atangin bul an tan ang.

"Club chairman, club leh fans te chungah lawmthu ka sawi duh a, Napoli-ah ka hun tawp ka hmang mek a ni. Pathianni hian match pawimawh tak kan nei, kum hnih chhung ka hun hmanna hi hnehna nena chhuahsan ka duh a ni," tiin kum 55 mi Spaniard Rafael Benitez chuan a sawi.

Benitez hian Real Madrid-in an ban tan Carlo Ancelotti ai a awh ngei dawn niin media te chuan an tarlang a. Sap ram chanchinbu te chuan Real Madrid coach thar tur hi Benitez a nih thu leh he thu hi 99%-a a chian thu an tarlang. Benitez hian Napoli tan Coppa Italia title a lakpui a, chubak record ropui an nei lem lo. Heti chung hian Real Madrid Under 19 coach a lo ni tawh a, 1990 chho khan Real Madrid first team assistant coach a lo ni tawh bawk a, hengte a nih avang hian Real Madrid hian an sawm leh a nih a rinawm.

Benitez hian Real Madrid a zawm dawn nge dawn lo tih sawi chian la ni lo mahse mi zawng zawngin Real Madrid nen an sawi zawm mek a. A team zawm tur chungchang Benitez hian a sawi lang duh hrih lo. Real Madrid a zawm lo a nih chuan Spanish chanchinbu Marca chuan Liverpool boss hlui hian a team hlui Valencia a zawm a ring a. Benitez hian Valencia a enkawl laiin La Liga title pahnih leh UEFA Cup pakhat a lo lakpui tawh a. Liverpool a enkawl laiin Champions League title a la tawh bawk.

Benitez chuan Napoli hotute chuan amah an duhsak avangin contract thar pawh an ziak hman tep tih a sawi rualin chhuah a tum nachhan chu a chhungte thutlukna vang a nih thu a sawi lang bawk. Benitez hian Napoli kum hnih a enkawl chhungin Italian Cup leh Italian Super Cup a lakpui a, Chelsea a enkawl laiin Europa League title a lakpui tawh bawk a ni.

Copyright © inkhel.com 2024. All rights reserved.