Liverpool chuan striker ṭha tak Alexander Isak chu British record transfer fee £125m-in an lei a, hetih lai hian an mamawh em em defender Marc Guehi erawh an la lut thei ta lo a ni.
Isak-a man hi £125m a ni a, add-ons te nen chuan £130m a kai thei dawn a, transfer bazar kharni leh Beihrual ṭanni, thawhṭanni khan Liverpool chuan Newcastle United aṭangin Isak hi an la lut fel a, Anfield-ah kum 6 daih contract an ziahpui a, Jersey number 9 an lo pe bawk a ni.
Tun nipui bazarah hian Liverpool an che na hle, player an lei hnem a, player lei nana an sum sen zawng zawng hi add-ons tel lo pawhin £416.2m lai a ni hem mai.
Liverpool a zawm hlimin Isak chuan, "Ka football career-ah bung thar ka kai a ni. Ka hlim turu lutuk a ni tawp mai. Liverpool zawm theihna hun ṭha ka nei hi ka lawm em em a ni.
"Hetah hian hnuhma ropui tak neih ka duh a, trophy tam tak hlawhchhuah ka duh bawk. Chu chuan nasa takin min tiphur bawk a ni.
"He hmun hi ka tan chuan duhthusam a ni a, ka ṭhanlen leh zelna tur leh bung thar ka kaina tur atana hmun pawimawh tak a ni dawn a ni," tiin a sawi.
Liverpool hian hmatawng an nei ṭha ta hle. Isak chu centre forward-ah a awm thei ang a, Ekitike chu hmatawng veilamah a awm thei ang a, Mo Salah a la chuai lo a, ani hi hmatawng dinglamah a awm thei bawk ang a, Premier League hmatawng hlauhawm ber an ni thei mai dawn.
Striker ṭha em em an neih avangin Liverpool an lawm em em a, hetih lai hian an mamawh em em defender Marc Guehi an la thei lo erawh a pawi vawng vawng maithei a ni.
Tun season-a an game hmasa pathumah Liverpool hian goal 6 ngawt an chhuah. Game tin goal hnih an chhuah a, Arsenal an hmachhawn tum kha chuan goal an chhuah ta lo.
Van Dijk hi a lo upa ve deuh tawh a, Konate lah tun season bak Anfield-ah hun a nei tawh lo a, Real Madrid nen sawi zawm an ni mek. Gomez hi defender ṭha tak ni mah se duhthusam loh chang a ngah ve mai.
Champions League, Premier League leh Domestic Cup te an han khel chho ang a, an centre-back a tu emaw ber an inhliam palh chuan Liverpool tlarhnung an buai phian maithei.
Heng te a nih avang hian Arne Slot chuan an mamawh a hre chiang a, Crystal Palace aṭanga Marc Guehi lak chhuah tumin hma a la. Transfer Deadline day-ah club pahnih te chuan inremna an nei vek tawh. A man chungchangah £35 million-in an inrem a, Guehi pawhin Anfield-ah medical a nei fel vek tawh nia report a nih laiin, transfer a tlawlh ta a ni.
Palace chuan Guehi thlakna tur West Ham aṭangin Igor Julio lak tumin hma an la a, mahse an la lut thei ta lo. Heng te a nih avang hian Palace chuan an defender hi chhuahtir an phal ta lo a ni.
Tun nipui bazarah Marc Guehi hian Liverpool pan thei lo mah se, thlasik bazarah emaw chuan a pan theih tho a rinawm. Selhurst Park-ah hian kum 1 daih contract a la nei a, contract thar a ziah loh chuan, nakkum nipui bazarah England defender hi free transfer-in a chhuak thei dawn.
Palace hian tun nipui bazar inhawn laia Guehi hralh kha an duh ve em em bawk a, mahse a thlakna tur an lak theih tak loah chuan, kawl zui an thlang ta a ni.