Board of Cricket for Control in India (BCCI) chuan hruaitu thar an nei dawn hnai a, India captain hlui Sourav Ganguly chu president thar tur a nih bakah hruaitu dang pawh hriat theih an ni tawh a. Heng zingah hian Cricket Association of Mizoram general secretary Mamon Khairuk Jamal Majumdar hming pawh a lang tel.
Cricket Association of Bengal president nihna chelh mektu Sourav Ganguly chu BCCI president tura tih fel a ni tawh a, October 23 ah hian official taka puanzar a ni dawn a. Gujarat Cricket Association hruaitu, Home Minister Amit Shah fapa Jay Shah chu BCCI secretary tur a ni bawk.
BCCI Electoral Officer N Gopalaswami chuan vice president ni tur hian Cricket Association of Uttarakhand hruaitu Mahim Verma a nih thu sawiin, joint secretary tur chu Kerala Cricket Association hruaitu Jayesh George a nih thu a sawi bawk a ni.
Chhattisgarh State Cricket Sangh hruaitu Prabhtej Singh Bhatia chu Councillor a ni dawn a, hei bakah hian Karnataka State Cricket Association hruaitu Parsuram Patel leh Cricket Association of Mizoram general secretary ni mek Mamon Khairul Jamal Majumdar te chu Governing Council Member ni turte niin a sawi bawk.
Thawhtanniah khan Sourav Ganguly chuan India rama cricket inrelbawlna lama hun pawimawh a thleng dawn hnai niin a sawi a. “India rama cricket inrelbawlnaah chuan hun pawimawh tak mai kan thleng mek a, kum thum kalta atanga thil awm dan atang khan a pawimawh zia hi a chiang a ni,” a ti.
“India cricket kalphung siam tha tura tangkai thei dinhmuna ka ding tur hi a lawmawm a, a lungawithlak ka ti hle a. Beiseina sang tak nen tun atanga thla eng emaw zat chhung chuan kalphung dika kan kal a, kawng dik kan zawh chhoh theih ngei kan ring a. India rama cricket huang chhungah boruak pangngai tak a awm chhoh theih kan beisei a ni,” a ti bawk.
Sourav Ganguly hi BCCI president a nih hunah chuan thla 10 chhung chauh he mawhphurhna hi a chelh thei dawn a. Kum 5 chhung chu Cricket Association of Bengal (CAB) ah president nihna a lo chelh tawh a, hetiang huang chhungah hian kum 6 chhung bak nihna chelh hi dan chuan a remti lo a ni.