12 Jun 2019 05:49

inkhel

Bayern zawm chungchang hi belh chian dawl lo a ni: Sane

Leroy Sane chuan tun hnaia Manchester City chhuahsana Bayern Munich zawm thei tur dinhmuna ding anga an sawi chu thu belh chian dawl lo mai a nih thu a sawi.

Manchester City midfielder Leroy Sane chu Bundesliga club lian Bayern Munich chuan an hmutai hle niin an sawi a, transfer window inhawn hunah Germany lama koh kal theih an tum dawn niin thu a thang mek a ni.

Thawhlehni khan Mainz khawpuia Euro 2020 qualifying khelhah Germany chuan 8-0 ngawtin Estonia an sawp a, he inkhelah hian Leroy Sane hian an ram tana goal hnuhnung ber hi a thun nghe nghe a ni.

German winger Sane hian season hman zawh tak kha a hmang tha thawkhat hle a, Premier League goal 10 thunin, match 21 ah chiah bul a tan thung a. Sane hian 2017-18 season aiin vawi 6 in bul a tan tlem zawk a ni.

Bayern Munich chuan an squad thawm that dan tur an ngaihtuah mek a, season thar tan hma ngeiin player thar lak belh nual an tum a. An player chhuanvawr pahnih Franck Ribery leh Arjen Robben te chu an chhuah ve ve avangin an hmun ruak luah tur hian player rintlak tak an mamawh belh hle.

City chuan Sane man hi an chhiar sang hle a, hei vang hian Bayern chuan hma an lak vak loh phah a. Bayern hian City thil tih dan chu a uchuak lutuk niin an sawi a, heti chung hian an thlithlai chhunzawm reng thung.

Hetianga thawm a awm chhoh takah chuan chanchinthar lakhawmtute chuan Leroy Sane chu Bayern Munich zawm a tum leh tum loh an zawt a, Sane chuan, “Tunah chuan chawlh ka hmang mek a, hna lampang kaihhnawih chu engmah ka ngaihtuah rih lo a. Tuna thu thang vak hi chu thu belh chian dawl vak a nih loh hmel,” a ti.

A sawi zelnaah, “Nakinah chuan engkim a la chiang vek mai dawn a, thil sawi lawk vak vak chi a ni lo a. Kha zawng kha Bayern Munich chungchanga sawi theih ka neih chu a ni mai,” a ti.

Kum 23-a upa Sane hi 2016 atang khan Etihad Stadium-ah a awm tan a, Manchester City chuan Bundesliga club Schalke atangin £37 million vel bawrin an lei a ni.