25 Mar 2020 10:57

bakteaJr.

Mizo tlangval

​Bayern player-te’n hlawh tih hniam rih an remti

German heavyweight Bayern Munich player te chuan coronavirus avanga buai a nih chhung chu an hlawh tih hniam an remti tih club chuan a sawi.

Bayern player te hian an hlawh chu 20%-in an ti hniam rih dawna, hei hi club chhunga staff, sum lama harsa zawkte he hun khirh laia tanpuina tur a ni tih Bayern chuan an tarlang bawk.

Borussia Dortmund player-te pawhin an hlawh chu tih hniam rih an remti ve bawk niin Bild chanchinbu chuan a tarlanga, anni erawh club lamin thuchhuah an la siam ve lo.

Kar hmasa lam khan Borussia Monchengladbach player te chuan an hlawh tih hniam rih hi an lo remti tawha, anni hi Germany-a hlawh ti hniam hmasa ber an ni.

Germany-ah hian tunah coronavirus kai mi 31, 554 hmuhchhuah an ni tawha, mi 149 in an thihpui tawha, tun thla ni 8 atang khan Bundesliga chu chawlh vek a ni.

Bayern striker Robert Lewandowski leh a nupui te chuan COVID-19 do nan hian euro maktaduai khat an lo thawh tawha, Bayern player dang pahnih Leon Goretzka leh Joshua Kimmich te pawhin theih tawpin sum lamah COVID-19 do nan hian hma an la mek bawk a ni.