Aaron Ramsey chuan Arsenal a chhuahsan hnuah Bayern Munich a zawm dawn niin a lang a, tunah hian German club nen hian an inbe mek a, an inrem teuh tawh hle niin an sawi.

Tun season tawp rual hian Ramsey chuan Arsenal-ah contract a hmang zo ve dawn chiah a, Arsenal nen contract thar ziak turin inbe mahse an inrem thei lo a, hei vang hian season tawp rualin free agent a ni thei dawn a. Heti a nih avang hian club thenkhat chuan Wales star hi an beisei hlawm a, Bundesliga club lian Bayern Munich chu an che nghal vat a ni.

Goal leh SPOX te chuan thu an dawn danin Bayern leh Ramsey te hi an inbe thuak tawh a, January 1 atangin mumal takin an inbe thei dawn niin an sawi a. Kum thar hma chuan England pawn lam club te tan official taka dawr theih a la ni dawn lo a, hei vang hian German club tan pawh chet lak vak theih a la ni lo a ni.

Barcelona, Juventus, Inter Milan, Manchester United leh Chelsea te pawhin Gunners star hi an beisei hlawm viau a, contract ziahpui dan tur an duang tawh hlawm niin an sawi bawk.

Ramsey chuan Arsenal nen an inrem theih tak loh avangin chona thar hmachhawn turin a inpeih thu a sawi tawh a. A contract neih lai hmang zo loa hmun dang pan chu a duh loh thu sawiin, contract a neih lai chuan theihtawp chhuahin Arsenal tan a khelh zel tur thu a sawi a. Contract a hman zawh hnuah erawh chanchin thar nei tura a inpuahchah dawn thu a sawi.

Bayern Munich leh Aaron Ramsey te hi lo inrem thei ni ta se, season tharah chuan Allianz Arena-ah amah chauh hi mi thar a ni dawn lo a. Bundesliga champion te hian France international defender Benjamin Pavard chu Stuttgart atanga la turin an be fel tawh niin thuthang a awm a ni.