15 Mar 2019 05:45

inkhel

Bayern Munich in player upa deuh thlak an tum

Bayern Munich chuan Liverpool hneh loa UEFA Champions League atanga an tlak hnuah an squad chu siksawi an tum thu an sawi a, player kum tam deuh tawhte chu chhawk then an tum thu an sawi.

Nilai zan khan Bayern Munich hi Liverpool nen an inkhel a, Bundesliga club hi an tlawm chiang hle a, Europe khawmualpuia inelna sang bera an zinkawng chu a tawp phah a. 2011 hnua a vawi khatna atan Bavarian club te chuan Champions League quarter final an thleng zo lo a ni.

Germany rama chanchinbu lar Bild chuan Bayern Munich leh Liverpool inkhelh tum khan Bundesliga champion in an khelhtirte kum chawhrual chu 30 niin an tarlang a. Nikum khan Bayern boss hlui Louis van Gaal chuan club thuneitu senior zawkte chuan an squad an tuaithar thei lo niin a lo sawi tawh a, hei hi pundit ho pawhin an pawm hle.

Coach Niko Kovac chuan Champions League atanga an tlak hnuah Bayern Munich chuan Bundesliga title lak leh German Cup champion nih chu an tum ber a nih tawh thu a sawi a. Pathianni hian Bundesliga table laihawla awm mek Mainz chu Allianz Arena-ah an lo mikhual dawn a ni.

An club player upa tan tawh pahnih, an winger chhuanvawr thin Arjen Robben leh Franck Ribery te bakah Brazilian right-back Rafinha te chuan June thlaah hian an contract an hmang zo tawh dawn a. Dutch winger Robben leh French winger Ribery te hi kum 35 ve ve an ni a, Rafinha hi kum 33 a ni tawh bawk a ni.

Bild chuan Robben, Ribery leh Rafinha te chu Bayern hian contract ziahpui zui tawh lo se tha an tih thu tarlangin, Hernandez, Benjamin Pavard, Hudson-Odoi leh Werner te chu chhawr nasa se a fuh an rin thu an tarlang.

World Cup title la thei, kum 22-a upa France defender Benjamin Pavard chuan Stuttgart chhuahsanin season thar atang chuan Bayern Munich ah hian a khel tawh dawn a. Bayern hian Chelsea forward kum 18-a upa Callum Hudson-Odoi pawh lak luh tumin vawi thum an dawr tawh niin thawm a awm a, England Under-19 forward hi an hmutai viau niin an sawi.

Atletico Madrid atangin Lucas Hernandez chu lak luh an rilruk bawk niin sawi a awm tel a, Hernandez hi an la thei a nih chuan centre-back Niklas Suele nen an inkawp thei ang a, kum 30-a upa pahnih Mat Hummels leh Jerome Boateng te chu kum 23-a upa pahnihte hian an thlak thei dawn a ni.

Germany midfielder hlui Lothar Matthaeus chuan, “Hummels leh Boateng te hi an kum a tam chho ve tan tawh a, an inhliam ngun angreng bawk a, a buaithlak chho tawh riau a. Lucas hi a la naupang a, Bayern hian an la thei a nih ngat chuan a tha khawp ang,” a ti.

RB Leipzig player Timo Werner chu kum 23-a upa niin 2020 thleng Leipzig-ah contract a la nei a. Club chuan contract ziahpui an rilruk a, mahse an inbe rem thei meuh lo a, Lewandowski thlak turin Bayern pan a rilruk nia sawi a awm a ni.

Thla hmasa khan Bayern Munich chairman Karl-Heinz Rumennigge chuan insiamthat an mamawh thu hi a sawi ve bawk a, hetiang tur hian hma pawh an la nual tawh nia sawiin, hmabak an la nei nual tih a sawi tel bawk.

“Ding lamah Joshua Kimmich kan nei a, vei lamah David Alaba kan nei bawk a, a laiah Suele a awm a, defence chu kan nei tha tan tawh viau a. Midfield-ah ni se Leon Goretzka chuan hma a sawn hle a, Kingsley Coman leh Serge Gnabry te chu wing-ah an awm bawk a ni,” tiin a sawi.

Canadian winger kum 18-a upa Alphonso Davies chu nikum July thla khan $13 million (11.5 million euros) in Major League Soccer club Vancouver Whitecaps atangin an la a, a chhawr theih tawh dawn bawk a ni.