15 Sep 2020 10:30

bakteaJr.

Mizo tlangval

​Bayern Munich-in Hudson-Odoi lak luh an tum thar

Bayern Munich chuan transfer window danga lak luh an lo tum tawh thin, Chelsea rawlthar Callum Hudson-Odoi chu lak luh an tum thar leh tawh niin Germany lama Sky chuan a tarlang.

Bayern hian nikum nipui bazar lai leh kumin thlasik bazar lai khan Chelsea winger Hudson-Odoi hi an lo dawr nasa tawh hle a, mahse Chelsea hian an player hi hralh an tum loh avangin Bayern hi an la hlawhchham zel rih.

Bayern hian kum 19 mi Hudson-Odoi manah hian pound maktaduai 35 vel lai an thehchhuak hmana, Hudson-Odoi pawh hian Chelsea hnenah chhuah dil hman hial mahse, Chelsea hian tunah erawh contract thar an ziahpui tawha, September thla liamta khan Hudson-Odoi hian Stamford Bridge-ah kum nga daih contract a ziak thar.

Chelsea hian tun nipui chhungin an tlarhma lam thawm that nan player an la lut thar nuala, wing lama khel thei Hakim Ziyech leh Kai Havertz te an lak luh bakah Christian Pulisic an la nei bawka, Hudson-Odoi hian inkhelhna hmun a chan tam theih a rinawm loh hle.

Season liamta khan Hudson-Odoi hian Chelsea tan Premier League-ah vawi 33 a inlan, mahse inkhel bul a tan erawh a tam lova, tun season-ah season hmasa aia khelhna hun a neih tam a rinawm loh.

Bayern hian Hudson-Odoi dinhmun hre rengin an dawr thar leh dawn niin a langa, Chelsea hian an winger hi a man a zir emaw, loan emawa an chhuah tir phal mai a rinawm hle a ni.