Bayern Munich-ah Arsene Wenger?

19th October 2018, 10:10PM

Bayern Munich chu tun season-ah an tum angin an che fuh rih lo hle a, hei vang hian an manager Niko Kovac lakah an lungawi tawh lo hle a. A awm zel dan tur hi an tichiang vat ang a, a aiawh tur hian Arsenal boss hlui Arsene Wenger an la thut mai thei.

A zawna Bundesliga title vawi 6 latu Bayern Munich hi tun season-ah chuan an che tha lo hle a, game 4 chhung chak hmel an hmu tawh rih lo a, paruknaah an awm mek a, hmahruaitu Borussia Dortmund aiin point 4 in an hniam tawh a ni.

President Uli Hoeness, chairman Karl-Heinz Rumenigge leh sporting director Hasam Salihamidzic te chuan chanchinthar lakhawmtute an kawm dawn a, hemi hnuah hian thu chiang a awm chhoh theih beisei a ni a. Anni pathumin chanchinthr lakhawmtute an hmachhawn hnuhnun ber chuan coach atana Jupp Heynckes an lakluh thu an puan tum khan a ni.

Bild chuan Arsenal a chhuahsan hnua hna chelh nei leh tawh rih lo Arsene Wenger chu Bayern Munich chungchang an sawipui a, “Hoeness leh Rummenigge te chuan buaina an tawh mek hi an chin fel ngei a ngai dawn a. An club player hluite kuta thuneihna dah zel hi a pawimawh ka ti a, Philip Lahm leh Oliver Kahn te hi an pawimawh hlein ka hria a. Niko Kovac chungchang hi chu ka sawi ve tur a ni lo a, Uli Hoeness leh Karl-Heinz Rummenigge te chuan Niko hi an ring a, an chelh zui zel turah ka ngai,” a ti.

Copyright © inkhel.com 2024. All rights reserved.