Philippe Coutinho chuan loan-a a kal mekna Bayern Munich chu awm chilh reng a duh thu a sawi.

Bayern Munich chuan Philippe Coutinho hi Barcelona atangin an hawh mek a, tun season tawp thleng an hawh thei dawn a. Brazilian star hian Bundesliga champion ho hnenah chuan awm hlen theih a duh thu a sawi chhuak a ni.

Camp Nou chhuahsana Allianz Arena lama hun a hman hnuah Coutinho chuan player tha tak a nihna a la lantir tam lo hle a. Tun dinhmunah Bayern Munich tan game 18 a khel tawh a, hengah hian goal 3 chu a thun ve twah a ni.

Coutinho chuan, “Ka awmna hi nuam ka ti hle a, helai hmunah hian kum khat ka awm phawt dawn a, ka ngaihtuahna zawng zawng pawh he club tan hian ka hmang chho dawn a ni,” a ti.

“Engtin nge ka awm zel dawn tih te, eng boruak nge ka tawn chhoh zel dawn tih te chu a la hriat theih loh a. Engkim a fel chho zel a nih chuan duhthusam a ni ang a, helai hmuna awm zui zel hi ka duh a ni,” a ti bawk.

Inrinniah khan Bayern Munich chuan Bundesliga-ah Bayer Leverkusen an mikhual a, mual neitute hi an chak lo a. He inkhelah hian Coutinho chu substitute bench atangin a lut ve a ni.

Niko Kovac a chhuah hnua Bayern Munich enkawl lailawktu Hansi Flick kaihhruaina hnuaia Bavarian club an tlawm hmasak ber niin, Hansi Flick hian tun season tawp thleng chu Bayern hi a enkawl ang.

Bayern Munich hi Bundesliga season kal mekah palinaah an awm a, hmahruaitu Borussia Monchengladbach aiin point 4 in an hniam mek a ni.