Chanchinbu mite chuan Arsene Wenger leh German club manager nei lo Bayern Munich-te chu sawizawm nasa hle mahse Germany lama Sky chuan Bayern hian kum 70 mi Wenger hi rawih an tum lo niin a tarlang ve leh ta.

Bayern hian Niko Kovac an ban hnuah manager an la nei leh lova, tun kar hian manager thar nei an tum lo niin tarlan a lo ni tawha, karleh lamah erawh manager thar an neih ngei a rinawm tawh hle.

Tunkar khan Wenger chuan Bayern nen sawizawm a nih chungchang sawiin, Bayern nena inbiak a hreh loh thu te a lo sawichhuak tawha, mahse Bayern lam chuan Wenger an biak hnuah rawih an tum loh thu an ti chiang ta niin Sky hian a tarlang.

Sky tarlan danin Bayern chief executive Karl-Hein Rummenigge leh Wenger-te hi tun kar Nilaini khan phone-ah an inbia a, an inbiak hnuah Bayern lam hian Wenger rawih tumna hi an nei tawh lo tih a tarlang.

Wenger hian nikum nipuia Arsenal a chhuahsan atangin club a la nei leh lova, tunah hian pundit hna thawk lailawkin khelmual sir awm leh ngei a tum thu te pawh a lo sawi tawha, mahse mi tam tak chuan a lo upa ve chho tan tawh nen manager hna chu a chawlhsan hlen mai an ring ve mek bawk.

Bayern hi assistant coach Hansi Flick chuan a enkawl lailawk meka, Flick hian Champions League inkhelah Bayern hi Olympiacos lakah si hnih faiin a chakpui tawha, Borussia Dortmund a hmachhawn pui leh dawn bawk a ni.