Bayern-in Odriozola an la lut

23rd January 2020, 04:01AM

German club Bayern Munich chuan Real Madrid atangin fullback Alvaro Odriozola chu tun season chhung atan loan-in an la lut fela, Spaniard defender hian jersey no. 2 a ha dawn.

Kum 24 mi Odriozola hian Bayern-ah medical neiin a lut fel vek tawha, a loan contract hian kumin June ni 30 thleng a daiha, Bayern hian hemi hnu hian lei ngheh theihna an nei lo.

Odriozola chuan Bayern a zawm chungchang sawiin, “Bayern Munich ang club lian tak ka zawm thei hi vannei ka inti em em a, he club inkhel hi ka naupan lai atangin ka lo thlir tawh thin. He jersey ka ha tur hi ka inchhuang a, he club-a lo luh hi hrehna pakhat mah ka nei lo,” a ti.

Sawi zelin, “Inkhel turin ka inpeiha, hun khawhral ka duh lo. Inkhelh ka duh a, beiseina ka lakah a san zia pawh ka hria. Schalke kan tum hun tur hi ka thlir der tawh. Kan team hi ka hmuh phat atangin team tha tak an nih zia ka hmu nghala, a aia tha an awm bik chuang lo. Spanish tawng thiam an lo awm nuala ka tlangnel nghal hle.

“Xabi Alonso leh James Rodriguez-te ka bia a, Xabi chuan Munich chu khawpui ropui tak a nih thu min hrilha, James pawhin he khawpui leh club hi a fak hle a ni,” a ti bawk.

Odriozola hian kum 2018 khan Real Sociedad atangin Santiago Bernabeu-ah a insuana, mahse Real Madrid-ah duh angin a khel rim lo. Real Madrid-in an manager atana Satiago Solari an hman chhung khan Odriozola hi a inkhel rim ve viau hmana, competition hrang hrangah vawi 22 Los Blancos tan hian a inlan a ni.

Copyright © inkhel.com 2024. All rights reserved.