Bayern-in Norwich right-back an duh

28th July 2020, 08:07AM

Bayern Munich chuan Premier League atanga relegate ta Norwich City fullback Max Aarons chu tun nipui bazar chhung hian lakluh ngei an duh tih Germany lama Sky chuan a tarlang.

Bayern hian Norwich right-back manah hian euro maktaduai 20 (pound maktaduai 18.3) an thehchhuah phal tih Germany lama Sky hian a tarlanga, indawrna pawh an kalpui thuai dawn nia sawi a ni.

Norwich hi Premier League lamah che chhe hle in, 20-naah an awma, mahse kum 20 mi Aarons hi a mimal takin a khel chhe lo hle a, Norwich tan competition zawng zawngah vawi 40 lai a inlan.

Bayern hian English rawlthar Aarons hi Benjamin Pavard-a thachhangdawl tu atan lakluh an duh nia sawi a ni a, Aarons hian first team a chan theih lohna tur lam pan hi a duh dawn em a sawi theih loh.

Aarons hi 2018-19 season pawh khan Norwich player pawimawh a ni tawha, Championship atanga Premier League an kaina kawngah a thawhhlawk hle.

Norwich hi Championship lamah an tlak leh nghal avangin an player tha an chan a rinawm hle a, Aarons hi duh tawh an awm nuala, ani bakah hian Todd Cantwell pawhin Norwich a chhuahsan a rinawm hle a, Premier League team-a a luh a rinawm viau a ni.

Copyright © inkhel.com 2024. All rights reserved.