German club Bayern Munich chuan an manager Hansi Flick chu contract thar an ziahpuia, Flick-a contract thar hian kum 2023 thleng a daih.

Flick hian nikum nipui mai khan Bayern hi a zawma, mahse a zawm tirh khan kha tih hunlaia Bayern manager Niko Kovac-a assistant a ni.

November thla khan Bayern leh Kovac te hi inremin, Kovac hian Bayern a chhuahsana, hetah hian Bayern chuan Flick hi an manager ni lailawk turin an an ruai chhunzawm.

Kum 55 mi hi a chet that thawkhat avangin nikum December thla khan Bayern chuan an a nghetin an ruai a, tun season tawp thleng atan contract an ziahpui.

Bayern hian Flick-a hnuaiah hian game 21 khel tawhin, heng zingah hian vawi 18 hnehna an chang theia, Bayern chuan Flick hi ringtawkin, kum 3 chhung atan contract thar an ziahpui ta a ni.

Tunah hian Bayern hi Bundesliga-ah point li in hma an hruai meka, khelh kua la awmin, an champion leh mai pawh a rinawm hle.

Germany-in kum 2014-a FIFA World Cup nomawi an chawi tum pawh khan Flick hi Germany manager Joachin Low-a assistant a lo ni tawh bawk a ni.