Man Utd in Di Maria hralh an duh tih kar kalta khan sawi a awm tawha, German champions Bayern Munich chuan Di Maria an duh thu an chhuah ve leh ta.

Amaherawhchu Old Trafford club hian Maria-a record fee, £59.7million lai phuhru pha thei thuak a manah an chhiar a rinawma, Di Maria a tlawm zawk zawk leh dawn lo niin a lang.

Argentine forward duhtu zingah Bayern an tel ve ta a, PSG in an duh thu an lo chhuah ve tawh bawk. Fifa Fair Play dan hmanga hrem ni mek PSG hian sum an thehchhuak tam thei dawn lova, Bayern tan remchanna tam zawk a awm phah ngei dawnin a lang.

Champions League ah beisei an phak lova, season leha a aia khawng zawka an khelh theih nan player tha dang Bayern hian an melh meka, Wolfsburg forward Kevin De Bruyne leh Raheem Sterling te chu an player melh langsar zuala sawi an ni.

Kum 27 a upa Di Maria hian United ah beisei a pha lo hle a, vawi 32 a khelh tawhah goal 4 chiah la thunin, March thlaa FA Cup match a Arsenal laka red card a hmuh hnu phei kha chuan Van Gaal hian chhawr duh mang mang tawh lo a ni.