German heavyweight Bayern Munich chuan Barcelona duh loh Philippe Coutinho chu an ngaihven viau niin chanchinbu mite chuan an tarlanga, lakluh dan kawng dan zawng mek niin tarlan a ni bawk.

Coutinho hi Barcelona chuan Neymar-a manah kal tir an tum mek niin chanchinbu mite chuan an tarlang nasa hle a, Coutinho hian PSG a zawm lo a nih chuan Bayern lam hi Coutinho lakluh tumin an che ve nghal dawn tih tarlan tel a ni.

Bayern hian Brazilian playmaker hi loan-a lakluh phawt an duh a, mahse hma an lak tak tak hmain PSG leh Barcelona lam indawr dan an ngaichang phawt niin a lang.

Coutinho hian loan-in Barcelona a chhuahsan duh lo niin sawi a awm a, a chhuak dawn a nih chuan a nghet law law chhuah a duh avangin Barcelona chuan a manah pound maktaduai 80 an lo chhiar tawh tih sawi a awm bawka, Coutinho hi heti zata dawrtu an la awm lo.

Bayern hian kum 2017-a James Rodriguez an lo lakluh ang deuhin Coutinho hi kum hnih chhung loan-a lakluh an duh tih Sky Sports chuan a tarlanga, mahse an lei nghet dawn a nih loh chuan mimal thilah Coutinho hi an inrempui theih a rinawm lutuk lo.

Barcelona hian nikum January thla mai khan Coutinho hi Liverpool atangin manto takin an lei a, mahse kum 27 mi hi beisei angin Camp Nou-ah a che tha lova, tunah hian Catalan club lam hian chhuah tir dan an dap mek.

Coutinho hi tun nipui bazar chhungin Arsenal leh Tottenham nen pawh nasa taka sawizawm an ni a, Tottenham-ah hian a lut tawh mai dawn emaw tih hnuah Liverpool playmaker hlui hi chhuak lovin Camp Nou-ah a awm chhunzawm.

Coutinho hian Camp Nou-ah kum li daih contract a la nei a, season khat leh a chanve chhungin Catalan club tan hian goal 21 a khung tawh a ni.