Bundesliga champion lai Bayern Munich chuan defender lakluh tur an dap nasa hle a, Barcelona defender Ronald Araujo chu an mi duh zinga mi a nih thu German journalist Florian Plettenberg chuan a tarlang.

Tarlan danin German club hian Uruguay international hi an ngaihven hle a, lakluh theih ngei pawh an inbeisei a, January thla-a thlasik bazar a inhawn hunah an dawr ngei a rinawm chho viau a ni.

Bayern manager Thomas Tuchel chuan Araujo hi a duh hle nia tarlan a ni a, mahse Barcelona chuan kum 24 mi hi chelh an tum viau thung a, contract thar zawrh an tum nia sawi a ni nghe nghe.

Araujo hian kum 2019 khan Barcelona senior team tana a game hmasa ber a khel a, tunah hian Barcelona defender pawimawh ber pakhat a ni a, an third captain a ni mek bawk a ni.

Araujo hian Barcelona-a a hlim thu leh, Barcelona captain nih theih a inbeisei thu te pawh a lo sawi tawh a, hetiang a nih avang hian Bayern hian an lakluh theih a rinawm loh viau a, mahse football-ah chuan sawi lawk theih a awm lo thung.

Bayern hian defender inhliam an neih nual avangin January thla-a defender lakluh tur an zawng nasa a, mahse Araujo hi January thla-a an lak theih a rinawm loh hle a, January thla-a an hlawhchham a nih pawhin nakkum nipuiah an dawr leh a rinawm hle a ni.