Franck Ribery chuan a chhuahsan tak Bayern Munich hnenah player lei nan pawisa hmang teuh turin a hrilh.
Bayern Munich chuan an club record thar siamin Atletico Madrid atangin France defender Lucas Hernandez chu an la lut a, Stuttgart atangin Benjamin Pavard an la tawh bawk a ni.
Heti chung hian Bundesliga champion chuan player dang an la melh belh mek a. An winger pahnih Franck Ribery leh Arjen Robben te an chhuah ve ve avangin an hmun ruak luah thei tur hi an la thlithlai a, duh an la thlang fel thei lo a ni.
German club lian hian Leroy Sane chu an hmutai hle a, lak luh atana an duh ber a ni mek a. Bayern hian Manchester City chu an be tawh a, mahse an la inrem thei lo a, dawr nawn leh an la tum viau niin an sawi.
Ousmane Dembele pawh Bayern hian lak an rilruk niin an sawi bawk a; amaherawhchu, Barcelona chuan France forward lei an dilna hmasa chu an lo hnawlsak niin an sawi a. Dembele aiawh chuan Sky Germany hnenah Niko Kovac leh a pawlte chu an zawm a rinawm loh thu a sawi a ni.
Ribery chuan Bayern hnenah chuan player thar lakna turin pawisa ren vak lo turin a hrilh a, season tharah pawh Borussia Dortmund chuan khum theih an tum leh viau dawn a, lo dang bet thei tur chuan squad thawm that a pawimawh hle niin a sawi bawk.
“Bayern hian player thiamna sang tak tak an mamawh a, pawisa pawh an hman hnem deuh a ngai ang a. An hmabak hi a duhawm hlein ka hria a, a phurawm ka lo ti viau a ni,” tiin Ribery chuan a sawi chhuak.
“Season thar tan hmain player thar an lak hman ngei a ngai a, Serge Gnabry leh Kingsley Coman te chauh nei chunga bul tan chhoh chu tlem chuan a huphurhawm deuh a ni,” a ti bawk.
A sawi zelnaah, “Sane hi player tha tak a ni a, Bayern chu hma lam a panpui thei dawn chiang a. A thiamna hi a namai lo hle a, vei lam leh ding lamah a khel kawp thei ve ve a. Bayern Munich a zawm duh dawn leh dawn loh hriat a chakawm khawp mai a, Bundesliga hi nuam a tih leh tih loh hriat ka chak,” a ti.
Kum 36-a upa Ribery hian a awm zel dan tur a la ti chiang lo a, Premier League club thar Sheffiled United nen tun hnaiah an sawi zawm a ni.