Inter Milan winger Ivan Perisic chuan Bundesliga heavyweight Bayern Munich a zawm ngei dawn a, medical pawh nei fel tawhin vawiin lam hian puanzar ngei a nih hmel.

Kum 30 mi hian Bayern hi loan-in a zawm phawt dawna, nakkum lamah hian an inlei nghet thei dawn em tih a la hriat loh.

Bayern manager Niko Kovac pawhin Perisic hian Bayern-ah medical a neih mek thu leh, engkim a kal tluan an player a nih tur thu a lo sawi tawh bawk.

Perisic hian San Siro-ah kum 2022 thleng contract la nei mahse Inter manager thar Antonio Conte chuan hman a tum lutuk lem lo niin a langa, Bayern lam player mamawh tak a lo ni bawk nen, Allianz Arena-ah a insawn fel thuai dawn.

Perisic hi Bundesliga-ah a mikhual lo hle a, kum 2011-12 season khan Borussia Dortmund-a a awm laiin, Bundesliga title a lo la tawh a, Dortmund-a a awm chhungin Bundesliga title bakah German Super Cup leh German Cup-te pawh a lo chawi tawhin Wolfsburg lamah pawh a lo khel sil hrep tawh a ni.

Perisic hi Arsenal leh ManchesterUnited nen pawh sawizawm a ni thin a, transfer request hial te pawh lo thehlut tawh thin mahse Inter hian an chelh zuia, tun nipuiah erawh a club a sawn ngei dawn ta niin a lang.

Bayern hian an winger rinrawl ni reng thin pahnih Arjen Robben leh Franck Ribery-te an neih tawh loh avangin winger tha lak luh tur an dap meka, Manchester City atangin Leroy Sane lakluh tum viau mahse Sane hi na taka a inhliam avangin dawr chhunzawm chi a ni lova, Croatian midfielder Perisic-a lam hi an hawi ta zawk a ni.