Baumgartner la tura rin kai Manchester United

27th January 2021, 07:01PM

Manchester United chu Hoffenheim atanga Christoph Baumgartner la thei tura rin kai ber an ni mek.

Kum 21 mi Christoph Baumgartner chu Austria ram chhuak zingah chuan kum eng emaw zat chhunga football khelh thiam ber niin an sawi mek a, Old Trafford lama seng luh tumin Manchester United thuneitute chu an phusa mek niin an sawi.

Austrian midfielder Christoph Baumgartner hi Manchester United hian an la lut dawn a nih pawhin January thlaah chuan lak an tum lo ang a, kumin nipui transfer window inhawn hun atan ruahmanna an siam niin an sawi a ni.

Baumgartner hian Hoffenheim-ah 2023 thleng contract a nei a, Bundesliga club hian an midfielder manah hian £16 million chhiar mah se lei duhtu an awm tak tak a nih chuan a man hi an tihsan ngei a rinawm.

‘New Michael Ballack’ tia a hming lem an vuah Baumgartner hi Premier League club eng emaw zat chuan an thlithlai mek a. 2017 ah khan kum 16 mi niin Hoffenheim a zawm a, kha tih laia an boss Julian Nagelsmann chuan khelhna hun a siamsak ve nghe nghe a ni.

Season pangngai a hman hmasak berah game 28 a khel a, hengah hian goal 7 chu a thun nghal a. Tun season kal mekah game 25 chu a khel tawh a, hengah hian goal 5 a thun tawh bakah mi goal thun tur vawi 7 chu a siamsak tawh a ni.

An ram aiawh turin Baumgartner hi nikum atang khan an ko ve tan a, ram tan hian vawi 5 chu a feh chhuak ve tawh a. Romania leh Greece te nen an inkhelh tumin goal a thun ve ve a, ram tan hian goal hnih chu a khung ve tawh a ni.

January thla transfer window inhawn chhungin Manchester United chu an phusa angreng hle a, club eng emaw zat chuan Jesse Lingard leh Brandon Williams te chu loan-a lak an dil bakah Facundo Pellistri chu hmun danga kal chhuahtir dan kawng an dap mek bawk a ni.

Copyright © inkhel.com 2024. All rights reserved.