Football khawvelah chang anilo; Manchester United leh Liverpool khawpui hi hmasangi ata tawh inhal leh in er reng reng a hun lo hmang tawh an ni a. Industrial Revolution lai khan he English khawpui hmingthang pahnih hian North West England a chungnung zawk nih tumin anlo in el fe tawh thin a. Manchester hian thil siamchhuahna hmunpui anihna a larpui hle laiin Liverpool hi an lawngchawlh hmun changtlung tak chu an hmingthanna a ni ve thung.
He khawpui pahnih, hmasang ata tawh hmelma kumhlun lo ni reng thin tawhte inkarah hian fans te intihbuaina leh huatthlalaawm tak taka in au elna phena an inhmelmakna bul tantu lian ber nia ngaih theih chu kum 1894 a sak, tuna Old Trafford ep chiaha luang, North west england sumdawnna khawvel rawn sawi danglam vektu, Manchester Ship Canal hi a ni.
He canal hian Manchester khawchhunga bungraw lakluh leh thawnchhuah chu North west sumdawnna hmunpui ber Liverpool lawngchawlh hmun kaltlang ngailo a kawng a hawn tak avangin Liverpool khaw mi tamtakin an eizawnna an chan phah a. He canal atang hian he khaw pahnihte inkara kum tamtak daih tur innghirnghona chu alo irhchhuak tak a ni.
Manchester Ship canal sak anih atang hian he British khawpui pahnihte hian sumdawnna lama chan tha zawk nih tumin nasa takin an inel a. Margaret Thatcher-i sawrkarna hnuaia an tlakchhiat hnuah phei chuan khualzin hip hnem zawk nih tumin khawpui chei that lamah pawh hma an la nasa hle a ni.
Hei mai hi ala nilo. Sumdawnna lama intlansiakna bakah hian music lamah pawh Liverpool leh Manchester hi an iner hle a. Khawvel pum huapa rock band lar The Beatles leh Stone Roses te lo chhuahna khawpui annih avangin rimawi khawvelah pawh a chungnung zawk nih tumin an in el nasa hle thin a ni. 1960’s chho vel khan khawvelin zaithiam leh musician tha nia a ngaihte chu Liverpool chhul chhuak an ni fur a. Heng zingah hian Cilla Black, Frankie Vaughn, Jerry and the Peacemakers te bakah khawvela rock band ding tawh a zawnga lar leh hmingthang ber nia chhal ngam, The Beatles te an tel a ni.
1980s leh 1990s chho ah erawh Manchester khawpui chhuak The Stone Roses, Happy Mondays leh Oasis ten rimawi khawvel an rawn luah ve leh thung a. Vawiin thleng hian Liverpool leh Manchester khawpuite hian rimawi khawvel, a bikin British rock music, a tunge thawhhlawk zawk tih zawhna chhanna ah an in ngai ve ve a ni.
English history a khawpui pahnih inkara innghirnghona nasa ber ni a an sawi thin, Manchester leh Liverpool inkara chungnung zawk nih tuma inelna hi football khelmualah a nasa ber awm e. Football stadium-ah ngei hian a ni lungngaih mittui leh lawmna mittui, thahrum thawhna leh inthliarhranna a thlen nasat ber thin.
Manchester City leh Everton lamin a khawpui ang zawng hian chan nei ve tho mahse Manchester United FC leh Liverpool FC te inhmelmakna hian a khuh hneh hle a ni.
Manchester United hian kum 1950 chho khan football khawvela hming dai tawhlo tur Sir Matt Busby hnuaiah team tha tak neiin a chungnung zawk nihna an chelh ren rawn a; vanduaithlak takin 1958 a Munich thlawhna chetsual avangin an rorelna chu a tawp a. 1960s chho khan first division title inchuhin club pahnihte hian an bei nasa hle a. Kum 1963 leh 1967 inkar khan trophy pawh an in chawi chhawk zak zak reng a ni.
Kum 1970 leh 1980 inkar hi Liverpool ropui lai niin England-ah leh Europe lamah football khawvel an chiah hneh hle a. Heta tang hian club pahnih fans te inkara innghirnghona hi a nasa lehzual a. Football stadium chhunga chanchin duhawmlo tak tak hriat tur a tam hle a ni. Kum 1990 leh 2000 inkar hian Sir Alex Ferguson-a hnuaiah Manchester United chuan tan la tharin nasa takin hma an sawn a. Liverpool erawh Kenny Dalglish in a chhuahsan avangin an tlachhe hle thung. Kum 2011 alo herchhuah meuh chuan Manchester United chuan Liverpool in league title 18 neihna record an chelh lai chu an rawn lehpel ta a ni.
Hetihlai hian Liverpool FC chu Champions League no mawi vawi 5 lai anlo chawi tawh avangin Europe lamah erawh vawi 3 chiah Champions League nopui la chawi Manchester United lakah hian an tlawm biklo hle a ni.
English football chhuah tirh ata tawh Mahchester United leh Liverpool inkhel hi football khelmuala chungnung zawk nih tuma in bei an nih mai bakah khaw ropui zawk nihna inchuha inel reng an ni bawk. An khaw chhuak rimawi leh culture zawng zawng football stadium chhungah hian an la lut emaw tih mai turin khawpin pahnih fans te hian he infiamna hi anla thutak hle a. The Beatles hla lar zualte phei chu Anfield ground khawk rum rum khawpin Liverpool fans te hian an inkhel tan hmain an sa rual dual dual thin a ni. Fans te hian in au nawmnahna hla pawh an duhtuilo in thu dengkhawng tak tak a tam thin hle.
Vawiin ni thleng hian football khelmualah chauhlo pawh he khaw hmingthang pahnih hi anla inhal hle a. Football khawvela hnuhma nei lian tak an ni ve ve a; tin, football fans nei tha berte zingah an chhiar tel theih bawk. English football a awm chhung hi chuan Manchester United FC leh Liverpool FC hi chu hmelma kumhlun an ni hlen ngei dawn niin a lang.
(adsbygoogle = window.adsbygoogle || []).push({});