Vawi hnih ngawt Indian Super League champion ni thei ATK chuan 2014 World Cup winner Bastian Schweinsteiger nen inremna an siam hnai nia sawi chu thuthang mai a nih thu an sawi.

Tun hnaiah Germany midfielder Bastian Schweinsteiger chu ATK hian an bia nia sawi a awm a, ISL season tharah chuan Bayern Munich midfielder hlui hian ATK jersey a ha dawn niin an sawi a. ATK coach thar Steve Coppell chuan Schweinsteiger hi lakluh a tum viau niin an sawi bawk a ni.

ATK thupuangtu chuan, “Tun dinhmunah chuan ATK hian Bastian Schweinsteiger hi kan la bepawp lo a, player dang pawh biak kan la nei rih lo a. Hetiang lampangah hi chuan sawi theih kan la nei rih lo khawp mai,” tiin a sawi.

An sawi dan chuan Steve Coppell chuan Bastian Schweinsteiger hi an team thuam chakna tura a sawi nasat ber a ni a, Kolkata team hian an dawr nual tawh a, an inrem dawn hnai niin an sawi bawk.

Club thupuangtu chuan, “Coppell hian Schweinsteiger hi a biak leh biak loh kan hriatpui hauh lo a, tuna thuthang mek hi thudik ni lem lo,” a ti.

ATK hian season liamtaah khan beisei an pha lo hle a, club 10 awmnaah game 18 khelhah point 16 hmuin 9-na an ni pha chauh a ni.

Super Cup-ah ATK hian round of 16 an thleng a, FC Goa an hneh lo zui a ni.