Ni li chhung awh Basketball Without Borders Asia 2018 chu an zo fel a, ram 16 atanga mi 66 kal khawm zingah India mi Sanjana Ramesh chuan MVP Award a dawng.
Basketball Without Borders Asia hi New Delhi khawpuia NBA Academy-ah May 30 atang khan an nei a, June 2 ah a tiak a. NBA leh FIBA hmalaknaa hetiang hun hi neih a ni a, India ramah hian vawi hnih an nghahna a ni a. Kuminah hian Asia-Pacific ram hrang hrang 16 atangin basketball khel thin mi 66 zet an fuan khawm a ni.
India ram atang hian hmeichhe naupang 18 leh mipa naupang 7 an tel a, heng naupang rual hi Corey Brewer (Oklahoma City Thunder), Caris LeVert (Brooklyn Nets), Kelly Olynyk (Miami Heat), Dwight Powell (Dallas Mavericks) leh Women’s NBA cager thin Ruth Riley leh Ebony Hoffman te chuan an hrual a. Indian basketball star Satnam Singh leh Amjyot Singh Gill te pawhin kum 17 hnuailam basketball player te hi an zirtir ve bawk.
Greater Noida-ah hian coach te chuan player te hi kawng hrang hrangin an hrual a. Chet dan te, position siam dan te, shooting te, five-on-five game te bakah chi dang tam tak an zir a. An zirtir bakah hian an intihsiak deuh fo bawk a, hriselna te, hruaitu dinhmun te leh inbiakpawh chungchang te pawh an zir tel bawk.
A tawp niah hian All-Star team pahnih an siam a, heng team pahnih te hi an inkhel zui a. Inkhelh zawh hian India tleirawl kum 17-a upa Sanjana Ramesh chu hmeichhe zinga Most Valuable Player atan an thlang a. Mipa lampangah chuan Philippines rawlthar Rence ‘Forthsky’ Padrigao chu MVP-ah hian an puang a ni.
Hmeichhe MVP Sanjana hi feet 5 leh inches 8 a sang a ni a, forward niin nikum khan Under-16 Asian Championship ah India captain a ni. “Helai hmuna international player leh coach te hnuaia ka thil zir zawng zawng hi a tangkai thei ang berin ka hmang ang a. Basketball hi ka khawvel a ni a, tuna ni 4 chhung kan camp hi ka hun tawna ni duhawm ber an ni,” tiin a sawi.
India ram atanga tel mipa naupang pahnih - Amaan Sandhu, 15 leh Princepal Singh, 16 te chu kum tina an neih thin Basketball Without Borders Global Camp a tel turin an thlang a. Hei hi USA pawnlama awm, NBA Draft-a tel thei tura an chher hriamna hmun a ni a. Tun thla tawp lamah Global Camp hi Italy-ah an nei dawn a ni.
NBA leh FIBA te hian khawmualpui 6 huam chhung ram hrang hrang 27 a khawpui 34 zetah Basketball Without Borders camp hi vawi 53 an buatsaih tawh a, heng camp-ah hian ram hrang hrang 127 atangin mi 3,190 te an lo tel tawh a. Camper zinga mi 47 te chu NBA ah an lut tawh nghe nghe a ni.
Tun tum hi India rama Basketball Without Borders Asia an nghah vawi hnihna a ni a, a hmain 2008 khan an lo nghat tawh bawk a. Hemi tum hian Vishesh Bhriguvanshi chu MVP a ni.
Girls All-Star Team:
Team Red - Rajvi Desai (India), Suniskha Karthik (India), Sreekala Rani (India), Indiah Bowyer (Australia), Pushpa Senthil Kumar (India), Jianjun Gao (China), Dan Zhao (China)
Team White - Siya Deodhar (India), Grishma Niranjan (India), Khushi Dongre (India), Sanjana Ramesh (India), Priyanka Behal (India), Paige Price (Australia), Guanpeng Liu (China)
Boys All-Star Team:
Team Red - Kaiga Matsuo (Japan), Rence Padrigao (Philippines), Joshua James Giddey (Australia), Chien-Hao Ma (China), Amir Hossein Aliyari Dehkordi (Iran), Kian Jamie Dennis (Australia), Matin Aghajanpour (Iran), Clancy Bird (Australia), Mac Stodart (New Zealand)
Dwight Powell Chiang-Shuang Chen (Chinese Taipei), Mohammed Sina Vahedi (Iran), Samuel Jenkins (New Zealand), Shintaro Ehara (Japan), Daniel Foster (Australia), Andre Tannoury (Lebanon), Lachlan Joseph Bofinger (Australia), Chao Wu (China), Harshwardhan Tomar (India), Princepal Singh (India)
List of Awards:
Boys Grit Award: Taine Murray (New Zealand)
Girls Grit Award: Vaishnavi Yadav (India)
High-Flyer Award: Lachlan Joseph Bofinger (Australia)
Boys 3-Point Champion: Amir Hossein (Iran)
Girls 3-Point Champion: Indiah Bowyer (Australia)
Boys All-Star Game MVP: Chen Chiang-Shuan (Chinese-Taipei)
Girls All-Star Game MVP: Dan Zhao (China)
Boys MVP: Rence Forthsky (Philippines)
Girls MVP: Sanjana Ramesh (India)