15 Feb 2020 03:57

inkhel

Basketball Hall of Fame-a lak luh tur zingah Kobe Bryant

Vawi nga ngawt NBA champion ni tawh Kobe Bryant chu kumina Basketball Hall of Fame-a an lak luh tur mi pariat zingah a tel.

Thla hmasaah khan Kobe Bryant te chuanna helicopter chu a chesual a, a chhunga chuangte chu a hmunah hian an thi vek a. Hetianga tawhsual a tawh hnu lawkah hian 2020 chhunga Basketball Hall of Fame-a lak luh tur zinga a tel thu hi an puang zui a ni.

Vawi 18 ngawt NBA All-Star lo ni tawh Kobe Bryant hi Basketball Hall of Fame-a lak luh tur zinga a hming an telh hmasak ber tum niin, a hming an sawi lan hmasak ber kumah lak luh atan an titlu nghal bawk a. An lak luh hunah chuan Springfield, Massachusetts-ah a hming chu a chuang ve reng tawh dawn a ni.

April 4 ah khian Atlanta khawpuiah Hall of Fame huanga seng luh turte hming hi an puangzar dawn a ni.

Kumin August 28-30 chhung hian Springfield-ah lak luhna hun hi hman tura ruahman a ni a. Hetah hian vawi 15 ngawt NBA All-Star lo ni tawh, vawi thum lai NBA Finals Most Valuable Player lo ni tawh bawk Tim Duncan te, vawi 15 ngawt NBA All-Star ni tawh, vawi kua lai NBA All-Defensive First Team ah pawh an lo thlan tawh Kevin Garnett leh vawi 10 lai Women’s NBA All-Star lo ni tawh, vawi li lai Olympic champion ni tawh Tamika Catchings te hming chu chhawp chhuah zingah an tel a ni.

A hmaa finalist lo ni tawh, US college coach Kim Mulkey, Barbara Stevens, Eddie Sutton leh NBA champion coach vawi hnih lo ni tawh Rudy Tomjanovich te hming pawh an chhawp chhuak dawn bawk a ni.

Hall of Fame chairman Jerry Colangelo chuan, “Tun tuma hming kan chhawp chhuahte hi an la tha deuh ber maithei a. Hun lo taka min kalsan ta Kobe Bryant hi chu tel ngei ngei tura ngaih a ni,” a ti.

“Tuna finalist kan chhawp chhuahte hi kan lawmpui hlawm hle a, an zinkawng lo zawh tawh zawng zawngin awmzia a nei chho tih a chiang hle a. Atlanta khawpuia Final Four-ah Class of 2020 hi puanzar vat vat kan chak tawh khawp mai,” a ti bawk.