Dawrpui Vengthar Branch YMA Golden Jubilee lawmna denchhena buatsaih, Invitational Basketball Tournament semi final chu khelh zawh a ni tawh a, a thlengtu Dawrpui Vengthar leh Ramthar Veng chuan an khingpuite hneh ve vein final-ah an inhmachhawn ang.
Dawrpui Vengthar vs Kulikawn
Semi final hmasa zawkah a thlengtu Dawrpui Vengthar leh Kulikawn an inkhel a, a tir atangin Dawrpui Vengthar in an ngam nghal hle a, Kulikawn lam an khel a fuh zan lo bawk a, 1st quarter tawpah 18-12 in Dawrpui Vengthar lamin hma an hruai.
2nd quarter-ah Kulikawn khel a fuh tan a, outside shooting a kal tan a, hma hruai zuai mahse Dawrpui Vengthar lamin chawlhlawk hmain hma an hruai let leh thei hram a, 37-34 in 2nd quarter tawpah an lead.
3rd quarter-ah an inkhel tawk hle a, Kulikawn lam an khel tha chho zel a, an inthlauhna a zim tial tial a, Dawrpui Vengthar bawkin hma la hruai mahse Kulikawn chu an tang bawk a, hma an sawn chho viau a.
4th quarter tir lamah pawh an inkhel tawk khawp mai a, nimahsela Dawrpui Vengthar paliante Kulikawn lamin an dang hleithei lo a, mid range 2-pointers leh paint atanga an luh theih em avangin 83-64 in Dawrpui Vengthar an chak ta a ni.
Ramthar vs Tuikhuahtlang
Inkhelh tan phat atangin Ramthar game a fuh nghal hle a, 3-pointers an lut mawlh mawlh mai a, Tuikhuahtlang defence inrem danin a zir loh bakah Ramthar player te chet that zan a ni bawk nen, 1st quarter-ah 24-12 zetin hma an hruai nghal a.
2nd quarter-ah pawh danglam em em a awm lo, Ramthar shoot apiang a lut emaw tih mai turin an khel tha hle a, half time-ah 40-22 in hma an hruai a ni.
3rd quarter-ah Lalrina, Sanga leh Hmingsanga te khel a tha sawt a, an inkar a zim chak hle, an pawtthla mai dawna a lan laiin Ramthar lamin Timeout an hmang tangkai a, Zonuna leh a thianten an hmahruaina an rawn belhchah thei ta a, an game tlemin a ziaawm leh deuh. Mahse, 3rd quarter-ah point 15 an score laiin Tuikhuahtlang lamin 18 an score thung.
4th quarter-ah pawh theihtawpin Tuikhuahtlang chu tang mahse Ramthar player ten an chhan let ve zel avangin hun tawpah Ramthar hian 69-56 in hnehna an chang ta a ni.
Team 32 inelnaah hian final-ah Ramthar Veng leh Dawrpui Vengthar te chu champion tumin April 28 (Inrinni) zan dar 8:00 ah an inkhel dawn a, he inkhel hi LPS in live coverage an ti dawn a, tin, Millions ISP lamin YouTube-ah an stream dawn bawk a ni.
Mizoram Basketball Association (MBBA) hriatpuia buatsaih Invitational Basketball Tournament hi D-3 Business Enterprise in an sponsor zara hlawhtling thei a ni a. He tournament-a pakhatna chuan Rs. 50,000/- leh trophy an dawng ang a, pahnihnain Rs. 20,000/- leh trophy an dawng ang a, semi finalist te’n Rs. 10,000/- an dawng bawk ang.