NBA superstar LeBron James chuan basketball khelh a chawlhsan hun tur a la hriat theih loh thu sawiin, a kum zat atanga teh chi a nih loh thu a sawi.

LeBron James chuan, “Mi hian NBA khawvelah an vanglai chu kum 27 leh kum 31 inkar bawr velah an tawng tlangpui niin an sawi fo a, chu pawh chu an vanneih chuan tih vel a ni a. Kei chu ka sawi ve thei mai lo a. Hetiang ang hi ka pawm ve lem lo a, a hun bithliah neih hi chu thil theih niin ka ngai lo,” a ti.

A sawi zelnaah, “Keimah bikah hi chuan theihtawp chhuah zel ka tum a, ka khelh chhung chuan ka theihna zawng zawng ka sawm khawm thin a, tih mai mai hi ka duh ve ngai lo a. Heng avang te hian kei chuan kum bithliah tih vel hi ka hrethiam ve vak lo a ni,” a ti bawk.

James hian NBA khawvelah kum 15 chu hun a hmang tling ve ta a, record pawh a siam ve ta nual a. NBA Finals khelh hmabak James hi a mimal ang chuan 2018 playoff-ah a chungnung hle a, most points (34.0), second-most minutes (41.3) leh third-most assist (8.8) te chu tun hnaia a tawn a ni.

NBA Finals an khelh hunah chuan James hi regular season leh postseason a game khel hnem ber a ni dawn a, ama record chelh lai a khum thei dawn a. 2010-11 season khan game 100 a lo khel tawh a, chumi kum chuan Miami Heat tana khelin Game 6 Finals-ah Dallas Mavericks an hneh lo a. NBA Finals a khelh chuan game 101 a khel tling dawn chiah a, record awm sa aiin game khatin a tam dawn chiah a ni.

Hei mai bakah hian James chuan regular season game 82 a khel kim vek a, hei hi a vawi khat puitlinna niin, playoff game 18 a khel leh vek a, inhliam vanga khelh theih loh awm miah loin playoff game 235 chu a zawnin a khel tling ta.

“Hetianga khel thei zel tura ka awm hi malsawmna ka dawn vang a ni a. Ka teammate te bula khel theia ka awm thin hi a lawmawm ka ti viau a. Kum khatah hian practice hi vawi hnih khat bak ka tel lo ngai lo,” tiin LeBron hian a sawi.