‘Iranian Hulk’ tia an sawi thin, Sajad Gharibi chuan kut lawnga insual, Bare Knuckle Fighting Championship a zawm a, kum tharah hian a insual ve tan ang.

Sajad Gharibi hi kg 177 (390 pounds) vel zeta rit niin, thenkhat chuan Persian Hercules tiin an sawi thin a. A pian danglam tak mai hi Instagram lamah a tarlanng thin a, hriat pawh a hlawh chho tawh hle.

Tun hnaiah khan Bare Knuckle Fighting Championship (BKFC) company president David Feldman chuan Sajad Gharibi hi kum thar atang chuan kut lawnga insualnaah hian a tel ve tan dawn niin a sawi.

David Feldman chuan, “2020 kum tir lamah hian Sajad Gharibi hi Bare Knuckle Fighting Championship-ah a inlan ve tan dawn a. ‘USA vs Iran: World War III’ tih hun buatsaih kan tum a, hetah hian Iranian Hulk hi a tel ve dawn a ni,” a ti.

“Persian Hercules hi contract kan ziahpui tawh zawng zawngah chuan a la fuh ber maithei a. Bare Knuckle Fighting Championship huangah hian a awm ngheh theih kan duhin kan beisei a, a lak atang hian thil ropui tak hmuh chhoh zel kan beisei tak meuh a ni,” a ti bawk.

ISIS do let tura sipaia tan a duh thu a sawi avanga lar chho tan Sajad Gharibi hian nikum lamah khan MMA a luhchilh dawn niin thu a thang tawh bawk a, tun thlengi engmah a ni zui ta rih lo thung.

Feet 6 leh inches 2 a sang, kum 27-a upa Sajad Gharibi chuan MMA huanga lut tur nia an sawi karah hian insual vat vat a chak tawh thu a sawi a. “Intihuai ula, sponsor phena biru reng lo khan insual tur hian min sawm vat vat teh u. Insual tur hian ka inpeih tawh a, ring chhungah eng nge i nih chiah rawn lantir teh le,” tiin a sawi.

MMA huangah hian a hmachhawn theih tura an sawi rik chu Brazilian Hulk, Romario dos Santos Alves niin, thla hmasaah khan Brazilian Hulk hian Iranian Hulk lu chu a thuai chhum dawn niin Instagram lamah a lo tarlang ve bawk a ni.