22 Jun 2019 05:12

inkhel

Bare-Knuckle Boxing

Tun hnaia infiamna lar chho tan, rothap em em mai, bare-knuckle boxing an tih, glove leh lukhum tel miah lo, kut lawng chauh hmanga inhnek chuan mi ngaihven a hlawh chho viau mai a, TV lamah entu an pung chak hle.

He infiamna huanga tel fighter te chu hmai him an awm meuh lo a tih theih a, a then chu hnar ruh tliak te, ha bal te, kak leh ser nei an ni fur hlawm a. Zanin hian boxing world champion vawi hnih lo ni tawh Paulie Malignaggi leh UFC fighter thin, Conor McGregor-a training partner ni bawk Artem Lobov te chu bare-knuckle boxing-ah hian an inhmachhawn dawn a ni.

Mi tam takin hmuhnawm an tih, bare-knuckle boxing chungchang hi tlem chu han bih chiang ila a tha awm e.

Bul tanna
Bare-knuckle boxing hi hriat theih hmasak berah chuan 1681 khan England ramah an ti tan a, bul an tan atanga kum 110 hnuah James Figg chu a champion a, he infiamna huanga champion hmasa ber a ni.

1867 thleng khan he infiamna hi an chhunzawm a, Marquess of Queensberry Rules an duang thar a, hei vang hian kut lawnga inhnek a rem ta lo a, kutkawr bun kher a tul ta a. Kutkawr bun an tihna chhan pawh hi an kut vengtu tur ni loin hmai vengtu atan an ti a ni.

Boxing pangngai chu a lar chho a, infiamna pangngaia pawm a ni a, 1900 chho vel atang khan Olympics-ah te hial an telh ta nghe nghe a. Bare-knuckle boxing chuan thawm a nei zui ta lo tial tial a, UK ah 1970 chho velah khan an tharthawh leh chiah a ni.

Hetiang hun lai vela boxer thenkhat, a hmaa suahsual kawnga hming hliauna lo nei tawh thenkhat chu professional boxing khelh ve phalsak an ni lo a, hei vang hian bare-knuckle boxing lamah hian an tuan a. Lenny McClean leh Roy Shaw te pawh a hmaa an hmingchhiat tawh avangin bare-knuckle boxing lamah hian an kal ta daih a ni.

Irish zin mi thenkhatte chuan inrem lohna an neih changin bare-knuckle boxing hmang hian an buaina an ching fel fo a. Hemi lantirna tha tak chu 2000 kuma Brad Pitt channa film lar Snatch kha a ni.

Danin a phal chiah em?
Bare-knuckle boxing hi UK bikah chuan dan hmanga khap a la ni chhin lo hrim hrim a. British Boxing Board of Control (BBBC) chuan an buaipui hran lo a, inkaihhruaina dan mumal pawh a awm lem lo thung a. A awmzia takah chuan he infiamna hi a hranpaa sorkar phalna la lem lo pawha kalpui zel theih tihna a ni ber.

America ramah chuan state hrang hrangah an kalpui dan a inang lo nual a. Promoter David Feldman chuan Bare-Knuckle Boxing FC chu a ti tan a, June 2018 ah khan Wyoming chuan BKB FC show hmasa ber atan sum thawh an inhuam thu an sawi a, tun thleng hian vawi ruk chu an buatsaih tawh a ni.

Eng dan nge awm?
UK bikah chuan kut lang theia inhnek an phal lo a, fighter te chuan an kut chu bandage hmangin an tuam thin a, heti chung hian bare-knuckle boxing tiin an la kalpui reng thung.

An dan hman hi boxing dan nen a inzul hle a, inseh, kapa inhnek, rabbit punching leh kiua innghawk te chu phal a ni lo a. Boxing pangngai ang lo takin an invawn laia inhnek an phal thung a ni.

Bare-knuckle boxing-ah hian round thum, round nga leh roung sarih te an inhnek a, round khat hi minute hnih zela rei a ni.

A him em?
UFC star hlui Artem Lobov chuan kumin April thlaah khan MMA fighter hlui Jason Knight chu point hmangin a hneh a, an pahnih hian hliam an tuar nasa hle a, an thi dun phung mai a. Jason Knight ha hi a bal a, a hnuah an pahnih hian an hliam thlalak thenkhat chu an tidarh zui a ni.

BKB president Feldman chuan fighter te chu inhliam thin mahse an hliam chu thluak lampang buaina emaw, dinhmun tha lo lutuk emaw a nih ngai loh thu sawiin, pem pangngai vel deuh chauh a nih thin thu a sawi.

A lar chak hle
Tun hnai kum nga vel chhung khan United States leh UK velah chuan he infiamna hi a lar chho em em mai a, pay-per-view tha tak niin, ticket an hralh zo thak thak zel a ni.

2000 tir lamah khan YouTube star Kevin Ferguson, Kimbo Slice tia mi hriat lar chu bare-knuckle boxing vang hian a lar hluai tawh a. Liverpool khaw chhuak Shaun Smith, ‘The World’s Scariest Debt Collector’ an tih thin chuan he infiamna hi a ngaina em em a, Netflix doumentary ‘Bare Knuckle Fight Club’ te a siam phah hial a. Mi lar tam tak chuan an buaipui chho hle a, hriat a hlawh belh zel a, ngaihventu pawh an pung tial tial a ni.