25 May 2015 05:15

Asanga Tlau

Barclays Premier League khelh zawh a ni ta

English Premier League khelh hmabak awm ang ang te chu zanin khan khelh zawh a ni ta a, kan hriat theuh tawh angin tun season BPL champions chu Chelsea an ni. Chelsea hian an game hnuhnung berah Sunderland chu hnehin game 38 khelhah point 87 an hmu a, 2-na ni ta Man City lakah point riat laia falin ropui takin season an khar ta a ni.

Season leha English club Champions League a kan hmuh turte chu Chelsea, City, Arsenal leh Man Utd te an ni a, Europa League ah Tottenham leh Liverpool te kan hmu thung ang. QPR leh Burnley te league atanga paihthlak an nih hnuah Hull chuan an hnung an zui a ngai ve ta a, goal awm lova United an draw chu Hull tan Premier League a inham tan nan a tawk zo ta lo a ni. Paihthlak theih dinhmuna ding Newcastle erawhin West Ham an hneh tak hlauh avangin Premier League match tawp ber khelh ni ah an him ta hram bawk.

Premier League atangin Liverpool legend Steven Gerrard thlah liam a ni ta a, chutiang bawkin Chelsea midfielder hlui Lampard pawh Man City chhuahsanin Premier League a mangtha hlen a ngai ve ta bawk. Drogba pawh season lehah chuan a hmel kan hmuh a rinawm tawh loh. Gerrard leh Lampard ten an inkhel hnuhnung ah hian goal an khung ve ve a, Gerrard erawhin a naute 6-1 laiin a chak pui zo lo leh thung a ni.

Ropui takin Chelsea chu BPL trophy hlan an ni a, tun season ah Chelsea khum zo reng an awm lova, season tluanin an tang khawnga, champion an phu hliah hliah. Champions League khel tura inhlangkai tawh United an chak zo lova, Hull City chu goal awm lovin an inhnehtawkpui. Arsenal in 4-1 ngawtin an mikhual West Brom an sawpa, Walcott a'n hattrick a siam nghe nghe. Man City pawh si hnih faiin Southampton lakan hnehna an changa, Premier League inkhelh tawp ber ni ah hian Newcastle tluka lawm an awm awm lo ve. He club neitupa Mike Ashley chuan Newcastle in hlawhtlinna engemaw tal an chan hma chu kalsan a tum loh thu a lo sawi tawha, Big Sam erawhin West Ham manager hna a kalsan tur thu inkhelh zawhah a puang chhunzawm.

Inkhel results dangte
Aston Villa 0-1 Burnley
Crystal Palace 1-0 Swansea City
Everton 0-1 Tottenham Hotspur
Leicester City5-1 Queens Park Rangers
Newcastle United 2-0 West Ham United