Barcelona president Laporta khan Barcelona club leiba kha $1.58 billion vel lai a nih thu August thla khan alo sawi tawh a, player lei leh hralh mai bakah an result thlengin a tuar chho mek a, eng tiang takin nge club-in a tawrh chhoh zel dawn tih leh engtin nge Barcelona an insiam that chhoh dawn tih chu thlir tawp mai chi a ni awm e.

Europe-ah pawh club lian ber pawl Barcelona hi engtiang takin nge hetiang zah leiba an neih theih a, tun dinhmun harsa angah hian engtin nge an tal luh theih tih chu sawi hlawhber niin a chhan lian tak tak ni a lang te han tarlang dawn ta ila.

Transfer chungchangah an talbuai :

Club in sum a siamna leh hman ralna awlsam ber chu transfer chungchang hi a ni awm e. Barcelona hian transfer window-ah risk an la huai em em a, player man to taka lei chungchangah thutlukna siam an awlsam a nih hmel.

Dortmund atangin 125 million euros lai sengin Ousmane Demebele an lalut a, beisei a phakloh zui mai bakah a inhliam reng avangin Barcelona-in an chhawr tangkai tak tak theilo. Club record fee in Philippe Coutinho kha 160 million euros laiin an lalut bawk a, field chhungah beisei a phakloh bakah hliam in a tlakbuak renga, Camp Nou chhungah Barcelona fan ten an club history a an player man to ber kha an au el hial a nih kha.

Griezmann, Umtiti, Andre Gomes te ho bakah an player lei thar ten beisei an pha hlei thei lova, transfer chungchanga an chetchhiatna ti belhchhah turin an player tha ber Lionel Messi kha a free a loh theihloh a an chhuah tir a ngai bawk a nih kha.

 Player te hlawh :

Barcelona-in leiba an ngah em em nachhan pakhat leh chu player te hlawh chungchangah ruahhmanna felfai tak an lo nei lova, hun lo kal leh zel tur an ngaihtuah thui lo a nih hmel. Player man to tak taka an lakluh bakah hlawh sang tak tak an hlawh tir a, heng zingah hian Griezmann, Coutinho, Pjanic te ho telin field chhungah an hlawh phu tawkin an khel tha leh bawk si lo nen Barcelona buaina a ti zual hle.

Barcelona tana thil pawi ber chu loh theihloh a an player tha ber leh an captain ni bawk Lionel Messi an chhuahtir a ngai ta kha a ni a. La Liga dan a salary cap, season khat chhunga club in player te hlawh atan a sum sen phal zat a bi tuk phak turin Barcelona khan 200 million euros vel lai chu players te hlawh tur an dahthat thin atangin an lak chhuah a ngai, buaina tak tak a rawn chhuak chho ta a ni.

Salary Cap La Liga lamin an bituk zat an pelh chuan Barcelona hian player an register thei si lova, chutih laiin player zinga hlawh sang ber Lionel Messi hmalam hun a khawih ta a ni. Messi hian a hun tawp rak thleng Barcelona-ah hian cham duh mahse a duh angin thil a kal thei ta lo. Salary cap pha tur hian a hlawh a chanve a tih hniam a remti a, heti chung hian La Liga in dan an siam chhungah Barcelona an la inkhung leng pha chuanglo a nih kha. Messi khan a hlawh thin chanve aia tlem in tlak hniam lo duh pawh nise La Liga dan pakhatah chuan player ten contract thar an ziah in a hma a an hlawh chanve aia hniam in club in contract thar a ziahpui tur a nilo tih dan alo awm bawk si a, a hlawh hmasa 50% aia hniam a contract tharah tawlh thlak hniam phalloh tihna a nih ber chu.

Mangan tawpah an player te zinga hlawh hnem Griezmann te leh Pjanic te an chhuah tir ta tawp mai a, an player senior Pique te hovin Barcelona tan tiin an hlawh an tih hniam tir bawk a, Barcelona dinhmun tlemin a ziaawm phah ve ta deuh a ni.  Barcelona President thar Joan Laprota pawh Barcelona inrelbawlna chungchangah a lungawilo em em a, president kalchhuak ta Josep Maria Bartomeu ten club an enkawl dan chu sawiselin awmze nei lovin player te contract lian tak tak an ziahpui thin chu a rawn sawisel ta siah siah mai a, ba tam tak Barcelona-in an neih phah nachhan ni reng bawk a ni.

Covid-19 :

Khawvela sumdawng lian tak tak te pawhin sum tam tak an channa chhan kha Covid-19 ni mahse Barcelona hian an tuar na bik hle a, a chhan bera lang pawh a chunga kan tarlan tawh te chungchangah harsatna an tawh mek laiin hripui lo leng khan buaina a ti belhchhah nasa.

Hri vangin stadium chhungah mipui in inkhel an en thei lova, ticket atanga sum tamtak an lakluh thin, an sum hnar pakhat a kang a ni. Kawng dangah sum lalut ve nual mahse club inrelbawlna a fuhloh avangin a sum lost zawngin an kal chho a, 2019-20 season-ah phei kha chuan 97 million euros lai Barcelona hian an lost a ni.

Barcelona innghahna La Masia :

Leiba an ngah a, khawvela player tha ber ber te an lakluh theih a rinawm tawh hrihloh. Player tha ber ber lakluh aiin player tha ber ber siamchhuah lamah an rilru an sen a, hmachhawp an siam ngai chho dawn niin a lang.

Barcelona hian an club academy La Masia hmangin player ropui tak tak Xavi, Ieniesta, Messi te ho an chherchhuak a, Europe mai bakah hun rei tak chhung khawvel an awp a nih kha. An dinhmun ngaia ding leh tur hian an acamdey player te an chher hriam a, first team lamah pawh khelhna hun an siamsak tam chhoh a ngai dawn niin a lang a ni.