Kumin kum tir atanga January 2016 thleng player lakluh FIFA chuan a phalsak lo. Hetia Barcelona hrem an nih chhan hi kum 18 hnuai lam player lakluh dan kawnga dan an bawhchhiat vang a ni.

April 2014 khan La Liga club hi hrem an ni a, thla 14 lai player thar lakluh an khap a ni. Barcelona chuan FIFA hremna hi an appeal ngei a, mahse FIFA chuan an hnawl sak a. Barcelona hian Court of Arbitration for Sport (CAS) -ah zualkovin, an zualkona hi December thla khan hnawl sak an ni leh.

Ar talh dan chi khat chiah a awm lo tih ang deuh khan, Barcelona hian kawng dan an dap chhunzawm zel a. Kar hmasa tawp lam khan Spanish sports daily Mundo Deportivo chuan Barcelona hian Manchester United player Juan Mata leh Porto right back Danilo te chu season tharah lakluh an tum thu a tarlang ta tlat mai.

FIFA in a hremna danah chuan player lakluh an phalsak lo hrim hrim a, January 2016 hma chu player leithar registered an phal sak lo. Mahse FIFA hremna danin a huam tel loh a awm. Barcelona hian an player duhzawng chu an lo be thei thova, an lei thei tho. Mahse FIFA in a phal sak loh ber chu registered kha a ni a, January 2016 hma hian transfer window-ah player an lei thei, mahse 2016 kum tirah chauh chung an player leite chu an register thei dawn a ni.