Barcelona nena sawi zawm ni chho leh mek Manchester City midfielder Bernardo Silva chuan Euro 2024 zawh ruala a hma hun chinfel a duh nia report a ni.

Kum 29 mi hian Man City-ah hun duhawm tak a hmang a, Premier League title 5, FA Cup 2 leh Champions League title 1 a la tawh.

Kum 2017 khan Etihad Stadium a pan a, kum 7 Man City-a hun a hman hnunin, Silva chuan chona thar hmachhawn a duh nia report a ni a, Barcelona lam a hawi mek nia report a ni.

Nikum nipui bazar inhawn lai khan Silva hian Barcelona a pan tawh dawn emaw kan ti hman, Barcelona lamah a hmel pawh hmuh a ni nghe nghe, Portugal-a a thian te Joao Cancelo leh Joao Felix te kianga khelh a duh nia tarlan a ni leh mek e.

Barcelona hian sum lamah harsatna an la tawk chhunzawm zel a, Silva hi an lei thei dawn nge dawn lo tih erawh sawi lawk a harsa khawp mai.

Liverpool striker Darwin Nunez an ngaihven nia tarlan a ni mek bawk nen, Silva hian Barcelona pan lo duh ta pawh nise, awlsam takin thil a kal zung zung thei dawn lo niin a lang.