Rafael Nadal chuan Martin Klizan chu quarter final-ah 6-0, 7-5 in a hneh a, Barcelona Open semi final a lut.

Inkhelh tan atangin Nadal hi a che tha nghal hle a, helai hmunah hian a zawnin vawi 17 chu a chak ta a. Spanish pachal Nadal hi clay court bikah vawi 42 chu a chak zawn ta bawk.

Inkhelh zawhah Nadal chuan, “Bul ka tan tha a, inkhel pawh ka thunun viau a, harsa lo takin set hmasa kha chu ka la mai a. Mahse, set hnihnaah thil a inthlak danglam a, ka che fuh lo ve lek lek thin a. A tawpah erawh a vannei zawkah ka tang a, ka chak theih phah a ni,” a ti.

Ranking lamah 140-na ni mahse Klizan hi tun tournament-ah a che fuh hle a, second round-ah Novak Djokovic pawh a lo hneh tawh a. Nadal hmaah erawh a che thei ta ngang lo a ni.

Nadal hian semi final-ah Spaniard Roberto Bautista Agut hnehtu David Goffin a hmachhawn dawn a. World No. 10 ni mek Belgian star Goffin hian Bautista hi 6-7 (3), 6-2, 6-2 in a hneh a ni.

Semi final lehlamah 6-3, 7-6 (4) a Bulgarian player Grigor Dimitrov hnehtu Spanish mi, Pablo Carreno Busta leh 6-3, 6-2 a 3rd seed Austrian Dominic Thiem hnehtu World No. 63, Greek star Stefanos Tsitsipas te an inkhel bawk ang.

Rafael Nadal hi tun tournament-ah hian a champion a nih chuan Barcelona Open title 11 a la tling tawh dawn a, World No. 1 a nih chhunzawm thei dawn bawk a ni.