Zirtawp zan khan Salt Lake Stadium-ah Barcelona chu Mohun Bagan nen an inkhel a, Barca hi 6-0 ngawtin an chak.

Kolkata khawpuia Salt Lake Stadium-ah Zirtawp zan khan entu mipui 25,000 vel zet an pung khawm a, hetah hian Barcelona Legends te leh Mohun Bagan Legends an inkhel a, mikhual zawk hi goal 6 ngawtin an chak a ni.

Real Madrid leh Barcelona star hlui Javier Saviola chuan inkhelh tan atanga minute 7 lekah goal a thun nghal a, Barcelona Legends chu hma a hruaipui a. Roger Garcia chuan minute 29-ah goal thun ve lehin Barca chu 2-0 in hma a hruaipui a.

Minute 43-ah Barcelona Legends hian penalty an hlawh chhuak a, Pedro Landi chuan petin a thun a, Barca hmahruaina chu a rawn belh chhah ve leh bawk a, half time a thlen chuan Barcelona Legends hian 3-0 in hma an hruai hman a.

Second half an khel leh a, Ajax atanga chawr chhuak, Liverpool leh Fulham vela khel thin, Finland star hlui Jari Litmanen chuan minute 63-ah Barcelona goal 4-na thunin, minute 86-ah pawh a thun belh leh a, Barcelona Legends chuan 5-0 in hma an hruai theih phah a.

Inkhel a tawp dawn hnai tawh a, ISL vela inlan ve thin, ATK leh FC Goa ah te pawh khel tawh Jofre Mateu chuan goal khat a thun ve leh a, hun tawpah Barcelona Legends chuan Mohun Bagan chu 6-0 in an hneh ta a ni.

FC Barcelona Legends team coach Albert Ferrer chuan, “Kan player te fitness that vangin nasa takin an danglam a tih theih a. Tun hnaiah pawh an la inkhel fo a, hei vang hian an chungnun theih phah a ni bawk a. Indian player te khan chutiang chu an ti ve kher em tih chu ka hriatpui hran lo a ni,” a ti.

Albert Ferrer hian FC Barcelona Legends game 9 a enkawl tawh a, hengah hian vawi 6 chu a chakpui ta a ni.