Liverpool chuan Champions League Quarter-final ah FC Porto hnehin semi final an lut a, semi-final ah hian Barcelona an hmachhawn dawn.

Liverpool hi Premier League lamah pawh champion mai thei dinhmunah an ding mek a, Manchester City nen inlehpel tawn rengin game khelh tur tlem tawh hle mahse champion tur a la sawi theih loh. Inkhel zawng zawng a pawimawh chho tawh a, tun kar tawp inkhelah Liverpool hian tlak hlau Cardiff City an tum dawn.

Liverpool manager Jurgen Klopp chuan Barcelona an tum turah rilru an la pek hman loh thu sawiin, Cardiff an tum turah chiah an ngaihtuahna an sen thu a sawi. Klopp chuan, “Semi final lut mah ila tun Sunday lo awm tur hian Cardiff kan khel dawn, Cardiff kan khelh tur chiah hi kan ngaihtuah rih a, chubak chu kan rilru ah a awm rih dawn lo.

“Barcelona kan khelh dan tur kan la ngaihtuah dawn rih lova, chumi tur chuan hun kan la nei dawn. Cardiff hian Huddersfield an hneh avangin tla lo thei an ni tih an inhria a, chuvang chuan game hautak kan beisei a ngai dawn a, Porto kan hmachhawn nen a danglam em em ka ring lo.

“Liverpool leh Barcelona intum tur hi mi tam tak tan chuan chanchin lawmawm a ni maithei, ka naute ka chhuang a, keipawh ka hlim em em a, hnathawh tur kan ngah hle bawk a ni,” a ti.

Porto nen an inkhelh chungchang sawi chhunzawmin Klopp chuan, “A tir darkar chanve chhung vel khan kan bet angrenga, kan goal kan venhim nasat a ngai viau bawk. Mahse kan inrintawkna kan hloh phah lova, ka naute an khel tha a, kan tum chu kan thei a ni tih kan hria. Kan bet ve lawk ani mai a, khami hnu kha chuan chance kan insiama goal pawh kan khung zui ta a ni,” a ti bawk.