11 Jan 2019 09:34

inkhel

​Barcelona-in Willian an rim thar leh

Barcelona chuan nikum nipui laia ngawrh taka an lo dawr tawh Chelsea winger Willian chu an dawr thar leh mek niin chanchinbu mite chuan an tarlang.

Barcelona hian Brazilian winger hi an duh ngang niin a langa, nikum nipui lai khan vawithum lai dawr thlawn tawh mahse beidawn mai an tum lova, nikum aia thlum zawkin Chelsea an dawr leh.

Barcelona hian Willian-a manah hian nikum nipui laia pound maktaduai 38 senga an lei Malcom chu pek tel an huam ni a tarlan a ni a, Malcom bakah hian pawisa fai pek tel an huam bawk. Malcom hi pound maktaduai 35 man bawr vela chhut niin, Barcelona hian Chelsea hnenah an player bakah hian pound maktaduai 15 vel tal pek tel inhuam bawk mahse Chelsea lamin an lo hnar leh niin an sawi.

Willian hi kum 30 tling hlim a ni a, Stamford Bridge-a a contract-ah thla 18 bak nei tawh lo mahse Chelsea hian Brazilian winger hi chhuah tir an tum mai lo tih a langa, Barcelona hian a aia tuihnai zawkin an dawr leh dawn em tih a la hriat loh.

Barcelona-in Willian-a mana pek tel an huam hi kum 21 mi chauh a la ni a, kum chanve vel liamta mai khan Malcom hian French club Bordeaux atangin Catalan club hi a zawm a, tum ang leh beisei angin a che tha  lova, a khel tam lo hle bawk. Tun bazar hunah Chelsea hian Willian hi hralh phal lo mahse, Christian Pulisic-a'n lalut tawh bawk nen Willian-a kum zat leh Chelsea kalhmang en bawk chuan, Willian hi nipuiah chuan Chelsea lam hian an chhuah phal tawh mai a rinawm hle a ni.