​Barcelona-in si 5 faiin Levante sawp

16th February 2015, 01:02AM

Pathianni zan La Liga match-ah Barcelona chuan si 5 fai ngawtin Levante an sawp a, he match hi Messi-a La Liga match 300 na chiah niin, Messi hian hattrick a siam nghe nghe a ni.

Lionel Messi hian La Liga mach 300 a khelh naah hattrick 23-na a siam nghal a. Inrinni zan khan Real Madrid chuan si hnih faiin Deportivo La Coruna an hneh a, khelh 23 atangin Real Madrid chuan point 57 an nei a, Barcelona hian point khat chiahin Real Madrid hi an phak lo a, League-ah pahnihna an ni mek a ni.

Barcelona 5-0 Levante

Neymar 17′ Messi 38′, 59′, 65′ (pen) Suárez 73′

Barcelona : Bravo, Montoya, Barata, Mascherano, Adriano, Rakitic (Sergi - 62' ), Busquets, Xavi, Pedro, Messi, Neymar (Suárez - 67' )

Levante : Mariño, López Mendoza (Remeseiro Salgueiro - 71' ), Navarro, Ramis, García Aranda, Xumetra, Mate Junior, Diop (Martín-Bejarano Serrano - 78' ), Morales Nogales, Barral, Uche (Casadesús Castaño - 62' )

Ref: Mario Melero López

Att: 74,963

Camp Nou-ah hian Barcelona hian an mikhuate hi an lo duat hleuh hleuh hauh lo mai. Goal hmasa ber hi 17th mins-a Brazilian striker Neymar khung a ni a, Messi siam sak tha zet chu Neymar hian goal-ah a chantir a ni. Messi chuan 38th mins, 59th mins leh 65th mins-ah te goal khungin, hattrick a siam ta a, a goal hnuhnung ber hi Neymar penalty hlawh chhuah atanga a khung a ni.

Neymar hi 67th mins-ah Suarez chuan a rawn thlak a, Suarez hi mual chhungah minute 5 a awm vel chiah ang tihin goal ropui takin a khung.73rd mins-ah Adriano cross tha zet chu Suarez hian mawi takin a lo back-volley a, 5-0 laiin Barcelona hian hnehna an chang ta a ni. Enrique leh a hote hian a zawnin vawi 11 lai competition hrang hrangah hnehna an chang ta a. 2008-09 season-a Pep Guardiola record Enrique hian a nihrual ta chiah bawk.

Barcelona hi player naupang an lakluh danah FIFA chuan thil diklo tiah ngaiin a hrem a, kumin chhung zawng player lei a phalsak lo. Hei hian Barcelona team chu nasa taka a nghawng miin an ring a. Mahse kumin kum bul an tan tha hle a, hnehna an chang chho ta char char a. Barcelona hian La Masia chhuak player tha tak tak a tul huna chhawr mai theih an nei nual a. Tin, Nipui bazar hnuhnung bera £75m-a Liverpool atanga an lei Luis Suarez chu Spain-ah awmhmun a sawh rem chho ta niin a lang a. Barcelona hian La Liga hmahruaitu Real Madrid chu point khat chiahin an thlau mek a ni.

Copyright © inkhel.com 2024. All rights reserved.