14 Jan 2020 01:04

bakteaJr.

Mizo tlangval

​Barcelona-in Pochettino an hmu tai

Barcelona chuan an manager Ernesto Valverde chu an ban dawn ta nge nge niin a langa, Barcelona hian an manager thar atan Tottenham manager hlui Mauricio Pochettino chu an hmu tai hle niin chanchinbu mite chuan an tarlang.

Spanish football expert Alvaro Montero chuan Barcelona hian an manager thar atan mi pathum hual an nei niin a sawia, Pochettino bakah hian Barca hian an player hlui Gabriel Milito leh Quique Setien-te chu an hual niin Montero chuan a sawi.

Pochettino hian Catalan club dang Espanyol a lo enkawl tawh thina, hemi a nih avang hian Pochettino chuan Barca hi a enkawl duh a rin loh thu Montero hian a sawi bawka, mahse football-ah chuan engkim a thleng thei tih hre vek tu te kan ni awm e.

Barcelona manager tur atan hian an player hlui dang Xavi-a hming pawh a ri ring hle a, kar hmasa lam khan Barcelona hian Xavi chu an kawm niin chanchinbu mite chuan an lo tarlang tawha, Xavi pawhin a club hlui enkawl chu a ‘dream’ a nih thu a lo sawi ve tawh bawk.

Xavi hian Qatari club Al Sadd a enkawl meka, Barca chuan Xavi hi an lalut duh a nih chuan season thar an nghah a ngai dawn niin a langa, hemi a nih avang hian club enkawl  nei lo Pochettino chu Barcelona hian tun thla hian an lak mai a rinawm chho viau.

Nikum November thla khan Tottenham chuan season nga leh a chanve an rawi hnuah Argentine manager Pochettino hi an bana, Pochettino hian tun thlengin club enkawl a la nei leh lo a ni.